Sulmohet Shtëpia e Kongresit të Manastirit në Maqedoni, në ditën e Përvjetorit të 108-të të alfabetit shqip. Persona të paidentifikuar kanë thyer xhamat e dritareve me sende të forta dhe më pas kanë vënë mbishkrime fyese si: “Vdekje për shqiptarët”.
Zëvendës ministri i Punëve të Brendshme, Agim Nuhiu, ka reaguar lidhur këtë ngjarje, si dhe ka dënuar aktin dhunues. “Jam këtu me bashkëpuntorët e mi për të shprehur përkrahjen institucionale për vlerat historike kombëtare të shqiptarëve. Dënojmë çdo sjellje, akt apo veprim vandalist nga kushdo qoftë që ka për qëllim cënimin e vlerave kombëtare të shqiptarëve dhe komuniteteve tjera në vend”, u shpreh Nuhiu.
Edhe zëvendës kryeministri Festim Halili gjatë vizitës së tij në Muzeun e Alfabetit ka dënuar këtë veprim dhe tha se janë ngritur të gjitha strukturat për të zbardhur këtë çeshtje.
“Sot para 108 viteve më parë, në këtë shtëpi u mblodhën delegatë nga të gjitha trevat shqiptare, por edhe nga mërgata me qëllim që të ulen të gjithë së bashku dhe të përpilojnë, njësimin e abetares së unifikuar shqiptare, respektivisht të shkronjave shqipe. Kjo shtëpi ka shpirtin e delirësisë, ka shpirtin e arsimimit shqip, edhe pse herë pas here kjo shtëpi sulmohet me gurë e guralecë, por shpirti i kësaj shtëpia do të ngadhenjejë gjithmonë, dhe se abc-ja shqipe çdo herë do të përdoret, për të dërguar përpara shkencën, arsimin, popullin tonë, por edhe gjithë njerëzimin”, tha Halili.
Ky nuk është rasti i parë që shtëpia muze e alfabetit të gjuhës shqipe në Manastir bie pre e sulmeve raciste./tesheshi.com
