Betejë e ashpër në raundin e dytë të zgjedhjeve lokale në Maqedoni. BDI ka arritur të fitojë Tetovën, Çairin, Strugën, Dibrën, Likovën dhe Sarajin, me vetëm pak vota diferencë, ndërsa koalicioni Aleanca me BESË ka arritur të marrë një qytet të madh si Gostivari, ku fitoi ministri i Shëndetësisë, Arben Taravari, kandidat i Aleancës për Shqiptarëve.
Lëvizja BESA ka fituar vetëm komunën e Zhelinës, ndërkohë që në Çair, Zeqerija Ibrahimi ka humbur për më pak se 200 vota, kurse Bilall Kasami në Tetovë ka mori 1 mijë vota më pak se Teuta Arifi.
Tashmë është e qartë se BDI-ja e Ali Ahmetit arriti të jetë fituese në qytetet kryesore shqiptare vetëm në sajë të votave të mbështetësve të LSDM-së së Zoran Zaevit, që kanë qenë determinante.
Në Tetovë dhe Strugë, popullsia maqedonase është relativisht jo e vogël dhe siç duket ka qenë ajo që ka ndikuar në fitoren e BDI-së.
Kryetari i BESA-s, Bilall Kasami deklaroi se në të vërtetë ka fituar LSDM-ja dhe jo BDI-ja. Kasami bëri thirrje për zgjedhje të parakohshme.
I ashpër ka qenë edhe Zijadin Sela, i cili nuk ja ka falur Zoran Zaevit 300 votat që i ka dhënë Ramiz Merkos, duke ndikuar kështu në humbjen e kreut të ASH-së, njeriut që i solli Zaevit fitoren reale ndaj Gruevskit.
Zijadin Sela deklaroi se veprimi i Zaev ka thelluar ndarjen etnike, duke bërë të ditur se mund të ketë reperkursione në qeverisjen e vendit.
Nëse largohet ASH-ja, numerikisht humb mazhoranca qeverisëse e Zoran Zaevit.
Vetë kryeministri ka deklaruar se nuk do të ketë zgjedhje të parakohshme dhe ka shtuar se “do të rritet mazhoranca parlamentare”, pa shpjeguar se ku do t’i marrë deputetët.
Megjithatë, beteja duket se nuk pa përfunduar akoma, pasi koalicioni Aleanca me BESË do të nisë një betejë ligjore me ankimime si në Komisionin Shtetëror të Zgjedhësve, ashtu edhe në gjykatë.
Me këtë diferencë kaq të ngushtë është normale një betejë ligjore, pasi bëhet fjalë për pretendime për parregullsi që mund të kenë ndikuar në momentin e fundit.
Dhe në fakt, me ndërhyrjen e Ministrisë së Brendshme të Maqedonisë, është vendosur që të ndahen çertefikata votimi deri në orët e pasdites.
Ky vendim i beftë mësohet se ka ndikuar në rritjen e disa votuesve që nuk ishin regjistruar. Këtë e bëri të ditur edhe Zijadin Sela, i cili akuzoi qeverinë për manipulime. /tesheshi.com/
