Marine Le Pen, kandidatja e Frontit Nacional në zgjedhjet presidenciale në Francë, ka bërë të njohur manifestin me “144 angazhime”.
“Synimi i këtij programi është së pari që t’i kthejë Francës lirinë dhe t’i japë një zë popullit,” deklaroi Le Pen në paraqitjen e manifestit një ditë më parë në Lion.
Përfaqësuese e ekstremit të djathtë në zgjedhjet e pas pak muajve, Len Pen është e mendimit se Franca duhet të rishqyrtojë marrëdhëniet me Bashkimin Europian dhe të heqë dorë nga monedha e vetme, përndryshe, duhet të ketë një referendum për largimin nga unioni.
“Këto zgjedhje presidenciale paraqesin dy propozime të kundërta. Zgjedhjen ‘globaliste’, të mbështetur nga të gjithë kundërshtarët e mi… dhe zgjedhjen ‘patriotike’, të cilën e personifikoj unë,” shprehet Le Pen në manifest.
Qeveria e ardhshme franceze duhet ta lërë zonën e euros, të mbajë një referendum të ngjashëm me Brexit-in, të vërë taksa për punëtorët e huaj, të ulë moshën e pensionit, thuhet në programin prej “144 angazhimesh”.
Në manifest parashikohet dhe rezervimi i disa të drejtave vetëm për qytetarët francezë, ndryshe nga tani, që u njihen të gjithë banorëve, frenimi i emigracionit, ndërtimi i burgjeve të reja, largimi nga komanda e integruar e NATO-s, etj.
Udhëheqësja e Frontit Nacional pritet që të ketë sukses në raundin e parë të zgjedhjeve presidenciale më 23 prill, por sugjerohet humbja e saj në balotazhin e 7 majit. Megjithatë, duke iu referuar rastit Trump, në Frontin Nacional besojnë se Le Pen mund t’ia dalë t’i fitojë zgjedhjet e të bëhet presidente e Francës. /tesheshi.com/
