Nga Miradije Asani
Ky 108-vjetor i Kongresit të Manastirit pati si prelud një akt të ulët vandal mbi godinën historike të gjuhës së shqiptarëve: thyerjen e xhamave dhe një grafit kërcënues “Vdekje shqiptarëve”. Ndodh kjo në një klimë të acaruar edhe politike e jo veç etnike, për shkak të fushatës elektorale, e që shpërfaq në finale një armiqësi emblematike ndaj çdo gjëje shqiptare në Maqedoni, por dhe pafuqinë e faktorit shqiptar për t’iu kundërvënë kësaj fryme me shumë sesa me deklarata rasti.
Nga Sektori i Punëve të Brendshme të Manastirit thonë se hetimet po vazhdojnë.
“Po vazhdojnë hetimet. Deri tani kemi siguruar xhirimet e kamerave të sigurisë, dhe po punojmë për zbardhjen e rastit”, thuhet nga autoritetet lokale të rendit.
Për këtë incident reaguan ambasadat shqiptare në Maqedoni, ajo e Shqipërisë dhe e Kosovës, të cilat kërkuan nga Ministria e Punëve të Jashtme të Maqedonisë, ndërmarrjen e masave adekuate për kapjen e autorëve të aktit të shëmtuar, me prapavijë etnike.
“Ju lutemi që të na sqaroni incidentin e përdhunimit të memorialit të Kongresit të Manastirit ditën e martë kur edhe shënohej kjo datë me rëndësi për alfabetin e gjuhës shqipe. Pasiqë ky është incident i përsëritur vite me rradhë. Ndaj kërkojmë që të mirren masa adekuate për mospërseritje të tillë dhe të gjinden autorët e këtij incidenti në panevojshëm”, thuhet në reagimin e autoriteteve shqiptare.
Megjithatë, ajo çfarë ndodhi nuk pengoi zhvillimin e aktiviteteve organizuar nga Ministria e Kulturës së Maqedonisë, ku u inaguruan 11 figurat prej silikoni të aktivistëve të Kongresit të Manastirit.
Por kjo është shumë pak. Objekti i muzeut të Kongresit të Manastirit ndodhet në gjendje të mjerueshme ku në shikim të parë është e vështirë të dallohet se aty është një gjurmë e rëndësishme në historinë shqiptare, pasi që edhe në Ditën e Alfabetit aty nuk qëndron asnjë simbol kombëtar. Përveç kësaj, në hyrje të ndërtesës shihen pllaka dhe materiale sanitare: janë produktet që shet shitorja e ndodhur po në të njëjtën ndërtesë. Përfaqësuesit politikë të Maqedonisë ende nuk e kanë rregulluar as pronësinë e muzeut dhe as zhvendosjen e dyqaneve. Premtimet e fundit për këtë godinë janë se do të fillojë rikonstruksioni i jashtëm i saj, por që do të jenë me financim nga IPA, konkretisht pra me financa evropiane.
Në qytetin e Manastirit vetëm 3% e popullatës janë shqiptarë. Ndërsa objekti i Muzeut të Alfabetit ka qenë shpeshherë edhe cak i sulmeve të huliganëve lokalë, ku dëmet e shkaktuara vërehen qartazi edhe sot. Ajo është dëshmia më e trishtë se raportet ndëretnike në Maqedoni janë në një fazë kritike. /tesheshi.com/
