Nga Bashkim Kastrati
Ata që duhet të japin dijen për nxënësit nëpër shkolla ka dyshime se nuk kanë diploma për vete, që rrjedhimisht nënkupton se nuk janë profesionistë për të kryer si duhet procesin mësimor.
Burime të portalit tesheshi.com kanë thënë se janë 93 mësimdhënës të Komunës së Malishevës për të cilët ka dyshime të bazuara se i kanë diplomat e falsifikuara dhe mbi bazën e tyre ka vite të tëra që japin mësim.
Këto burime thonë se listat me mësimdhënës që dyshohet se i kanë diplomat e falsifikuara, iu kanë dërguar secilës shkollë në këtë komunë, ndërsa pritet shumë shpejt vendimi final për suspendimin e tyre.
Në lidhje me këtë çështje, drejtori i Drejtorisë për Arsim dhe Edukim në Komunën e Malishevës Blerim Thaçi, ka thënë për tesheshi.com, se ky rast është nën hetime nga organet e drejtësisë dhe se kjo drejtori ende nuk ka marrë asnjë njoftim apo dokumentar zyrtar në lidhje me këtë çështje për të proceduar me tutje me masa të parapara ligjore.
“Sa i përket këtij rasti, mund të themi se diplomat me urdhër të Ministrisë së Arsimit Shkencës dhe Teknologjisë janë në proces të verifikimit dhe të hetimeve, kështu që ne nuk mund të vlerësojmë aktualisht e përfundimisht se a janë false a jo”, ka thënë Thaçi.
Mësimdhënësit e dyshuar për falsifikim u “amnistuan” nga drejtësia
Burime të portalit tesheshi.com bëjnë të ditur se Njësia për Krime Ekonomike e Policisë së Kosovës në Pejë, në vitin 2009 kishte ngritur kallëzim penal ndaj 93 mësimdhënësve të kësaj komune nën dyshimin për falsifikimin e diplomave universitare. Por, drejtësia për këtë rast nuk është vënë asnjëherë, pasi gjykata ka “amnistuar” të gjithë këta mësimdhënës duke parashkruar lëndën për ndjekje penale ndaj mësimdhënësve.
E këtë e konfirmon edhe drejtori i Drejtorisë së Arsimimit dhe Edukimit në Komunën e Malishevës Blerim Thaçi. Ai thotë se kjo lëndë njëherë është parashkruar nga gjykata. (Parashkrimi i kallëzimit penal nënkupton vjetrimin e lëndës dhe kalimin e afatit kohor prej pesë viteve për ta trajtuar atë kallëzimin penal, e që si pasojë, palët e dyshuara nuk dalin fare para drejtësisë, por shpëtojnë. Pra lënda nuk trajtohet fare, pavarësisht se ka të bëjë me dyshime për vepër penale).
E çuditërisht edhe lënda e 93 mësimdhënësve me diploma të falsifikuara është parashkruar, pra nuk ka pasur prioritet një lëndë e tillë që të trajtohet brenda periudhës pesë vjeçare.
“Drejtoria e Arsimit dhe Edukimit në Malishevë ka marrë një shkresë zyrtare nga Gjykatat të cilat njoftojnë për parashkrimin e lëndës në fjalë. Nuk posedojmë ende ndonjë vendim të prerë rreth kësaj, procesi është duke vazhduar nga organet e drejtësisë”, theksoi Thaçi.
Ai thotë se në rast se vërtetohet se këta mësimdhënës kanë diploma false, Drejtoria për Arsim dhe Edukim e kësaj komune nuk është përgjegjëse, sepse sipas tij nuk është kompetencë e drejtorisë në fjalë të vlerësojë përfundimisht për legjitimitetin e diplomave.
“Drejtoria e Arsimit nuk ka mekanizëm që mund të vërtetojë origjinalitetin e diplomave me rastin e konkurrimit për punësim. Derisa nuk vërtetohet fajësia ne nuk mund të ndërmarrim masa pa ndonjë vendim përfundimtar nga organet e drejtësisë dhe Ministrisë së Arsimit Shkencës dhe Teknologjisë. Përgjegjësia e lëshimit të diplomave të cilat dyshohet për falsifikim iu takon autoriteteve përkatëse të arsimit të lartë dhe administratës që ka proceduar me lëshimin e diplomave. Në momentin që DKA në komunën tonë, merr ndonjë vendim përfundimtar nga organet kompetente, rreth diplomave të dyshuara për falsifikim, ne do të veprojmë sipas ligjit për arsimin e lartë”, u shpreh drejtori Thaçi. /tesheshi.com/
