Pas 38 vitesh, mjeku kryesor i Bajernit, Myler-Volfart, së bashku me stafin e tij dhanë dorëheqjen direkt pas humbjes 1-3 ndaj Portos në muajin prill. Kjo erdhi si pasojë e përplasjes së tij me trajnerin Pep Guardiola dhe bosin Karl-Hainc Rumeniges. Atij iu faturuan dëmtimet që i kushtuan Bajernit skualifikimin nga Champions-i dhe kupa. Por pas tre muajsh duket se gjakrat janë ulur dhe Pep Guardiola është pajtuar me fizioterapistin më të mirë gjerman, Myler-Volfart.
Njeriu që bëri një hap kaq paqësor për çudi nuk ka qenë gjerman, por legjenda e Milanit, Paolo Maldini. Mjeku Myler-Volfart po darkonte me legjendën italiane Paolo Maldini në restorantin luksoz “Schumann”. Ashtu siç raporton “Bild”, në këtë mbrëmje ka ndodhur edhe një takim i fshehtë mes Pep Guardiolës dhe Myler-Volfart. Maldini ndodhej i vetëm me mjekun dhe më pas telefonon trajnerin Pep Guardiola.
Spanjolli e pranon ftesën dhe ulen së bashku në tavolinë. “Më besoni, nuk kam probleme me Myler-Volfart. Ne folëm për të kaluarën dhe biseda qe korrekte”, tha Guardiola gjatë konferencës për shtyp. Gazeta “Bild” ka fotografuar edhe momentin kur Pep Guardiola përqafohet me mjekun gjerman. Aty zyrtarizohet edhe paqja mes tyre. Në tavolinë mbërrin edhe atleti xhamajkan Usain Bolt. Mjeku kryesor Myler-Volfart ishte larguar edhe një herë në kohën e Klinsmanit, por Uli Hënes e pat rikthyer.
U përfol për rikthimin e dytë, por ish-presidenti ka dalë nga skena dhe fizioterapisti gjerman ka refuzuar të rikthehet. Sipas burimeve të “Sportbild”, Bajerni ka reformuar stafin mjekësor. Drejtimin e tij e ka marrë doktor Ernst-Oto Mynsh dhe Folker Braun. Por, lojtarët bavarezë vazhdojnë të vizitohen dhe marrin këshilla nga Myler-Volfart, duke e vizituar atë te klinika në Mynih. /tesheshi.com/
