Ish-kryeministri i luftës së Kosovës, si njihet Pandeli Majko, thotë se krijimi i asocacionit të komunave serbe kufizon sovranitetin e Kosovës. Ai nuk e barazon këtë asocacion me një Republika Srpska si ajo e Bosnjes, mirëpo thotë se përbën një veprim që prodhon sovranitet të kufizuar në një pjesë të vendit.
Në një intervistë për gazetën “Zëri” në Kosovë, Majko thekson se Serbia po kërkon të ruajë ndikimin e saj në vendimmarrjen në Kosovë, duke kërkuar që përveç shtetit serb të garantojë interesat e veta në një hapësirë më të madhe.
Themelimi i asocacionit të komunave serbe në Kosovë, nënshkruar në Bruksel gjatë dialogut për normalizim të marrëdhënieve mes dy vendeve, është pritur negativisht nga opozita, e cila ka thënë se ky asocacion e copëzon Kosovën. Opozita ka paralajmëruar protesta masive.
Ndërkaq, Majko gjatë intervistës ka prekur edhe ushtrinë e Kosovës, e cila po pengohet nga Lista Srpska në parlament. Sipas Majkos, Kosova duhet ta formalizojë ushtrinë e vet.
Majko, ka pohuar se sikundër për publikun në Kosovë, edhe më gjerë ekziston një dyzim i arsyeshëm për ato që po realizon klasa politike në këtë vend pas miratimit të paketës Ahtisari. /tesheshi.com/
