Një ditë pas zgjedhjeve ndërkombëtarët kanë kërkuar që sa më parë të formohet qeveria e re e Kosovës.
Një kërkesë të tillë e kanë bërë nënkryetarja e Parlamentit Evropian, Ulrike Lunaçek, njëherit edhe raportuese për Kosovën në këtë parlament, si dhe Komisionari Evropian për zgjerimin e negociatave, Johanes Hahn.
Lunaçek u kërkon partive që të formojnë shpejt një qeveri të re me frymën evropiane.
“I bëj thirrje partive të Kosovës që të formojnë shpejt një qeveri për të trajtuar sfidat e ndryshme dhe për të vazhduar rrugën e Kosovës në BE. Qeveria e ardhshme, duhet të fokusohet në krijimin e kushteve më të mira ekonomike dhe sociale, si dhe të punojë më shumë në arsim dhe shëndetësi.
“Kjo është ajo që qytetarët kërkojnë! Kjo është ajo që miqtë e Kosovës në BE duan për qytetarët e Kosovës”, ka thënë Lunaçek për “Arbresh.info”.
Kurse Hahn ka thënë se “përgjegjësia është që udhëheqësit politikë në vend të formojnë sa më shpejtë qeverinë”./tesheshi.com/
