Europa posaçërisht ka marrë frymë e lehtësuar nga fitorja e centristit Emmanuel Macron në zgjedhjet presidenciale në Francë.
Më shumë se një gëzim për fitoren e tij, është gëzim për humbjen e Marine Le Pen-it, ekstremistes së djathtë, që nëse do të kishte siguruar pëlqimin e shumicës së votuesve franceze mund ta kishte shtënë tërë BE-në në një vorbull pasigurie e telashesh.
“Urime Emmanuel Macron-it për fitoren e tij të madhe sot [dje] si presidenti i ardhshëm i Francës. Shpresoj shumë të punoj me të,” ka qenë reagimi i menjëhershëm në Twitter i presidentit amerikan Donald Trump.
“Fitore për Macron-in, për Francën, për BE-në dhe për botën,” do të shkruante në të njëjtin rrjet social dhe Hillary Clinton, që vetë do të dështonte në zgjedhjet presidenciale amerikane të muajve më parë.
Shtëpia e Bardhë nuk do të mungonte në përshëndetjen për presidentin e ri të Francës përmes një deklarate zyrtare, ku uronte Macron-in dhe popullin francez për zgjedhjet e suksesshme presidenciale.
Zëdhënësi i kancelares gjermane Angela Merkel, Steffen Seibert, do ta shprehte kështu urimin në Twitter: “Urime Emmanuel Macron. Fitorja juaj është fitore për një Europë të bashkuar dhe të fortë, është fitore për miqësinë franko-gjermane.”
Presidenti i Komisionit Europian, Jean-Claude Juncker, e përshkroi fitoren e Macron-it si një zgjedhje nga populli francez të një të ardhmeje europiane, ndërsa për Donald Tusk-un, presidentin e Këshillit Europian, francezët i kishin thënë jo tiranisë së lajmeve të rreme, duke zgjedhur lirinë dhe barazinë.
Shumë i përzemërt ka qenë Justin Trudeau, kryeministri kanadez, në urimin e tij.
“Urime Emmanuel Macron! Le të takohemi së shpejti, e të vazhdojmë të punojmë për t’i forcuar lidhjet e thella midis Kanadasë dhe Francës,” lexohet në llogarinë e Trudeau-t në Twitter. /tesheshi.com/
