Lulzim Basha rikthehet në Lazarat, dy vjet pas operacionit antikanabis dhe ka prezantuar platformën ekonomike të opozitës pikërisht nga fshati i cili ende nuk po e merr veten pas boshllëkut që ka lënë trafiku i drogës.
Me një lëvizje të studiuar, kreu i Partisë Demokratike nuk e ka përmendur fare çështjen e kanabisit por ka folur për taksa, vende pune, rimëkëmbje ekonomike dhe konçensione.
E ka zgjedhur Lazaratin për të lançuar platformën e hartuar nga disa profesorë të njohur të ekonomisë në SHBA dhe Britani, të cilët priten të vijnë dhe të afrohen nga Basha si drejtues të fushatës së PD-së.
Ata janë shqiptarë por kanë emigruar jashtë si shumë të tjerë. Burime të selisë blu i thanë tesheshi.com se platforma ekonomike do të jetë e thjeshtë, e studiuar dhe totalisht në antitetezë me Ramën.
Por zgjedhja e Lazaratit mësohet se është konsultuar dhe me ndërkombëtarët, të cilët e kanë vlerësuar mjaft mospërmendjen e aksionit anti-kanabis të vitit 2014. Ndërkaq, është kujdesur nga ana e PD-së së Lazaratit që në takim të marrin pjesë sa më pak njerëz problematikë. Roland bejko, kreu i PD-së së Qarkut i cili është edhe nga fshati, ka mobilizuar sa më shumë gra dhe të rinj në takim. Madje është ngritur edhe një treg i vogël për t’i dhënë pamjet e një takimi popullor me tregtarët në Lazarat që shesin mallra normale.
Dhe pikërisht për gratë ka qenë premtimi më i bujshëm i Lulzim Bashës që tha se do ta ulë prensionin 60 vjeç për to. Mësohet gjithashtu se pikat bazë të programit ekonomik që përveç uljes së moshës së pensionit do të kenë rritjen e pagës minimale që sot është 30 mijë lekë, përfshijnë edhe elementi alla Cipras që shteti do të subvencionojë faturën e energjisë elektrike deri në 200 kw, si dhe të ujit për familjet në ndihmë ekonomike.
Basha premtoi edhe anulimin e konçensioneve në energji, por kjo duket si më shumë se për fushatë. Edhe Rama të njëjtën gjë bëri në 2013 por kanë kaluar 3 vjet dhe nuk i anulon dot pasi marrëveshjet nëse prishen kanë kosto të lartë.
Por kryetari i PD-së ka premtuar edhe se në zgjedhjet e 2017 shqiptarët do të votojnë në mënyrë elektronike vetëm me gisht, pra me shenja gishtash ku do të identifikohet çdo zgjedhës dhe jo duke mbledhur kartat e identitetit një ditë para. /tesheshi.com/
