Borusia e Dortmundit fitonte një javë më parë ndaj Bajernit të Mynihut në Bundesligë. Një fitore me shifra rekord, 8-4, pasonte të martën e lënë pas në Champions League. Çuditërisht, sot pëson një humbje krejt të pamenduar ndaj Eintrahtit të Frankfurtit.
Në “Commerzbank Arena”, Eintrahti befason në nisje të pjesës së dytë, ndërkohë që fraksioni i parë i lojës ishte mbyllur pa gola.
Huszti shënoi për vendasit në minutën e 46-të, një epërsi që do të zgjaste gjer në nisje të çerekorëshit të fundit të takimit.
Aubameyang u duk se e ktheu lojën në favor të Borusias kur shënoi në minutën e 77-të, por Eintrahti u përgjigj menjëherë me anë të Seferovic-it.
Eintrahti i shkaktoi humbjen e tretë në kampionat Borusias, duke fituar 2-1. Me 21 pikë, Borusia e Dortmundit është për momentin në vend të gjashtë në renditje, por dhe një barazim i Hertës të dielën mund ta zbresë më poshtë.
Këlni, skuadra ku luan Mavraj, nuk e shfrytëzoi faktorin fushë në këtë javë të 12-të të Bundesligës, duke barazuar 0-0 me Augsburgun. /tesheshi.com/
