Shqiptarët këtë herë mund të jenë të rëndësishëm jo vetëm për të marrë komunën e Çairit, ose thënë më qartë, pjesën e qytetit pas Urës së Vardarit, apo siç e quajmë ne këtë minibashki por edhe për bashkinë e madhe, ose siç quhet “Qyteti i Shkupit”, që prej mbi 70 vitesh kontrollohet nga maqedonasit.
Shkupi ka katër minibashki apo komuna: Çairin, Gazi Babën, Kisella Vodën dhe Qendrën. Thuajse të gjitha pjesët e qytetit banohen nga shqiptarë, por Çairi është thuajse totalisht e banuar nga shqiptarët.
Duke parë këtë, edhe VRMO-DPMNE edhe LSDM e Zaevit që është në qeveri me shqiptarët, ka nisur gjuetinë për votat e shqiptarëve.
Nga 560 mijë banorë që ka Shkupi, mbi 26% e tyre janë shqiptarë, por që përçarja ka shkaktuar uljen e faktorit të tyre politik.
Siç bëri të ditur Komisioni Qendror i Zgjedhjeve, Gruevski ka rikandiduar për kryetar të Shkupit, Koce Trajanovskin, ose mikun e Ilir Metës, i cili erdhi në Tiranë në mitingun përmbyllës të LSI-së për të gjetur mbështetje politike në zgjedhje.
Shqiptarët kanë dy vota të rëndësishme në dorë: atë për bashkinë e madhe, por edhe për komunën e Çairit, që natyrisht e kanë të sigurtë. Por buxhetin për komunën e Çairit e ka në dorë bashkia e madhe.
Deri tani i gjithë yxhymi politik është bërë për Çairin më shumë në formë folklorike, kur realisht shqiptarët janë faktor kyç për bashkinë.
Zaev ka vendosur si kandidat zëdhënësin e LSDM-së Peter Shilegov, i cili gjatë trazirave të prillit mbajti qëndrim të fortë pro shqiptarëve. Siç duket ai e ka nisur herët fushatën e tij. Partitë shqiptare, ndërkohë kanë vendosur të gjitha kandidatët e tyre, duke rrezikuar kështu që vota të humbasë kuptimin.
BESA ka vendosur si kandidate Nafie Selmanin, Aleanca e Shqiptarëve ka kandiduar Naim Bajramin, kurse PDSH, Bekim Fazlliun. BDI nuk ka paraqitur kandidat, siç duket për të mbështetur njeriun e LSDM-së.
Zgjedhjet lokale të Maqedonisë, sidomos në kryeqytet, janë një rast i artë ku mund të faktorizohet vota dhe të marrë peshë kërkesa politike. Çairi vërtetë është një log i rëndësishëm por nuk është vendi ku merren vendimet e mëdha. /tesheshi.com/
