Milovan Deçun, kryetari i komisionit të parlamentit serb për Kosovën, ka shpërthyer ndaj Hashim Thaçit pas kërkesës për të rrëzuar Gjykatën Speciale.
Siç bën të ditur B92, Deçun e cilëson grupin që dërgoi propozimin në Kuvendin e Kosovës si “një bandë e Hashim Thaçit”.
Sipas deputetit serb, që është edhe një nga politikanët e rëndësishëm të partisë në pushtet të Vuçiçit, ligji për rrëzimin e Speciales ishte “një mesazh drejtuar komunitetit ndërkombëtar, se ata duan të destabilizojnë Kosovën dhe rajonin”.
Ai nuk u ndal me kaq, po e cilësoi peticionin e 16 mijë ish-ushtarëve të UÇK-së, si një “kërcënim se Hashim Thaçi është gati të ngrejë në këmbë 16 mijë ish-terroristë, nëse është pjesë e hetimeve për krime lufte”.
Deçun deklaroi më tej se “nuk do të ketë pajtim mes palëve nëse nuk dënohen ata që kanë shkaktuar viktima te serbët”.
Ndërkaq, ministri serb i Mbrojtjes, Aleksandër Vulin, tha më herët se “nëse Prishtina do të anulojë Gjykatën Speciale, atëherë Beogradi do të ndërpresë dialogun e nisur disa vite më parë nga Brukseli”. /tesheshi.com/
