Nënkryetari i Lëvizjes Socialiste për Integrim, Luan Rama, ka reaguar përmes një postimi në rrjetet sociale, mbi listën me 124 emra të implikuarish në veprimtarinë kriminale të kultivimit të lëndëve narkotike në Shqipëri. Reagimi i Luan Ramës vjen një ditë pasi Kryeministri Edi Rama dhe më pas ministri i Brendshëm, Dritan Demiraj, pohuan ekzistencën e një liste me emrat e personave të implikuar në kultivimin dhe trafikimin e lëndëve narkotike. Luan Rama thekson se lista me emrat e këtyre personave duhet të dërgohet në Prokurori dhe kjo e fundit menjëherë duhet të nisë proçedurat ligjore.
Komenti i Luan Ramës
Kryeministri e më pas edhe Ministri i Brendshëm, deklaruan se disponojnë një listë me 124 emra të implikuarish në veprimtarinë kriminale të kultivimit e trafikimit të drogës në Shqipëri!
Kaq nuk mjafton! Si funksionarë të lartë të shtetit ata duhet ta dinë se e kanë për detyrë të veprojnë në zbatim të ligjit duke kryer si hap të parë dërgimin e listës së emrave dhe të të gjithë të dhënave që kanë në Prokurori!
Ndërkaq, Prokuroria, nëse nuk e ka bërë, duhet të nisë menjëherë procedurat që ligji e detyron, për hetimin dhe fillimin e çeshtjes penale për emrat e listës që disponon Kryeministri dhe Ministri i Brendshëm!
Shteti ka ligje dhe funksionon përmes zbatimit të ligjit! /tesheshi.com/
