ish-ushtari i UÇK-së Anton Lekaj, nga Gjakova, ka përfunduar vuajtjen e dënimit në burgjet e Serbisë. Në vitin 2005, ai u dënua me 13 vjet burgim nga Gjykata e Qarkut në Beograd për krime luftë të kryera ndaj popullsisë civile në Kosovë, menjëherë pas ndërhyrjes së NATO-s.
Lirimin nga burgu të Lekajt e kanë konfirmuar familjarë të tij, të cilët kanë treguar se tashmë është nisur për t’u kthyer në Kosovë.
Gjakovari ishte arrestuar më 17 gusht të 2004-ës në Malin e Zi, më pas ishte ekstraduar në Serbi ku iu dha dënimi pas 1 viti seancash gjyqësore.
Lekaj ka vuajtur dënimin deri në ditën e fundit, pa u amnistuar asnjë ditë.
Në vendimin ndaj tij, gjykata serbe pretendonte se krimet, Anton Lekaj, i kreu nën komandën e ish-komandantit të UÇK-së për Zonën e Dukagjinit, Ramush Haradinaj.
Sipas vendimit, 37-vjeçari, dy ditë pas ndërhyrjes së NATO-s në Gjakovë, kreu vrasjen e një personi dhe torturimin e përdhunimin e disa civilëve të tjerë, që i përkisnin komunitetit rom, ashkali dhe një serbi.
Në bashkëveprim me Lekajn, sipas Prokurorisë serbe, ishin edhe pesë ushtarë tjerë të UÇK-së. Por katër prej tyre, proçedura u është pezulluar për shkak të pa mundësisë për t’i sjellë para gjykatës serbe, ndërsa i pesti Besim Bistrazhini ka ndërruar jetë. /tesheshi.com/
