Eurodeputeti Knut Fleckenstein, i cili është edhe reporter për Shqipërinë në Parlamentin Europian, thotë se raporti i ministrave teknikë të Partisë Demokratike, për zgjedhjet e qershorit, nuk do të ketë një ndikim negativ në integrimin e vendit.
Fleckenstein shprehet se raporti merr një vlerë tjetër, nëse edhe OSBE/ODIHR kanë vërejtur të njëjtat shkelje dhe më pas mbetet për t´u parë se si do të veprojë qeveria
“Raporti i ministrave teknik jo domosdoshmërisht do të ndikojë negativisht në procesin e integrimit të vendit. Më e rëndësishme është nëse OSBE ODIHR ka vërejtur të njëjtat shkelje dhe nëse po, se si qeveria do të merret me to”, tha eurodeputeti.
Në një intervistë për Report Tv, Fleckenstein thotë se kishte besim tek ministrat teknik, por shton se raporti i OSBE/ODIHR përcakton nëse ata kanë bërë gjithçka për garantimin e votës së lirë.
Isha shumë i sigurt se “ministrat e ri teknik” do të bënin çmos për të garantuar lirinë e votave. Por tani duhet të presim që raporti i OSBE-së të vlerësojë nëse është bërë gjithçka e mundur për të garantuar lirinë e votave të qytetarëve shqiptarë”, shtoi ai.
Intervista
A do të ndikojë negativisht raporti i ministrave të opozitës për zgjedhjet parlamentare 2017 në integrimin e Shqipërisë?
Raporti i ministrave teknik jo domosdoshmërisht do të ndikojë negativisht në procesin e integrimit të vendit. Më e rëndësishme është nëse OSBE/ ODIHR ka vërejtur të njëjtat shkelje dhe nëse po, se si qeveria do të merret me to.
Shkelja e lirisë së votës vazhdon ende si fenomen, a mendoni se qeveria shqiptare ka bërë mjaftueshëm për të garantuar këtë liri?
Isha shumë i sigurtë se “ministrat e ri teknik” do të bënin çmos për të garantuar lirinë e votave. Por tani duhet të presim që Raporti i OSBE-së të vlerësojë nëse është bërë gjithçka e mundur për të garantuar lirinë e votave të qytetarëve shqiptarë.”
Qeveria e Rama 2 për shkak të 74 mandateve është sot më e fortë, opozita vazhdon të jetë e dobët. Çfarë garancie kanë qytetarët shqiptarë për demokracinë?
Nuk kam dyshim se partitë e opozitës do të kenë një vështrim të afërt për procedurat dhe sjelljet e qeverisë. Sigurisht që ata do të informojnë publikun për vëzhgimet e tyre dhe qasjet alternative për mënyrën e mundshme të qeverisjes. Një shumicë absolute nuk është një rrezik për demokracinë.
