Emocionet e garës më prestigjioze në Europë, ligës së Kampionëve rikthehen këtë mesjavë me ndeshjet e dyta të fazës së grupeve. Duele interesante do zhvillohen edhe gjatë këtij raundi, ku skuadrat e mëdha europiane do të kalojnë në provat e tyre të radhës. Më të vështirë do ta ketë Barcelona, e cila pret në shtëpi skuadrën gjermane Bayer Leverkusen.
Blaugranasit nuk duhet të llogarisin shërbimet e lojtarit më të mirë të tyre Lionel Messi, pasi është i lënduar dhe do mungojë një kohë të gjatë.
Të gjithë njohësit e futbollit presin të shohin gjigantin katalunas se si do funksionojë pa gjeniun e saj, Messi. E vështirë do jetë edhe për teknikun e skuadrës, Luis Enrique i cili në konferencën para sfidës e pranoi faktin se Barça do jetë më e dobët pa argjentinasin.
“Një lojtar si Messi nuk mund të ketë zëvendësim. Ne kemi luajtur edhe më parë pa Messin, por diferenca është e madhe brenda fushës së lojës. Por, ne do të gjejmë alternativën për t’ia dalë mbanë. Do jemi të bashkuar”, u shpreh Enrique.
Në duelin tjetër të grupit E, Roma e favorizuar udhëton drejt Bjellorusisë për t’u përballur me Baten Borisovin.
Në grupin F, Arsenali do mundohet të lërë pas humbjen turpëruese në ndeshjen e parë nga Dinamo Zagreb, kur të presë në shtëpi grekët e Olimpiakosit. Në ndeshjen tjetër përballen skuadrat që triumfuan në ndeshjet e para. Bayern Mynih dhe Dinamo Zagreb, do të ndeshen me njëra tjetrën në Alianz Arena, për të bërë diferencën e pikëve në renditjen në tabelë që në javën e dytë të fazës së grupeve.
Edhe trajneri i bavarezëve, Pep Guardiola shprehet i bindur në suksesin e skuadrës së tij përballë kampionëve të Kroacisë.
“Dinamo ka skuadër mjaft cilësore dhe lojtarë teknikë. Në përgjithësi, Ballkani po prodhon shumë lojtarë me kaq shumë klas. Ata kanë mbi 45 ndeshje pa humbje, por është koha të njihen me të. Nëse dëshiron të kualifikohesh për në fazën e eleminimeve duhesh të fitosh të gjitha ndeshjet. Ne do synojë ta bëjmë atë duke e mposhtur edhe Dinamon si kundërshtar”, përfundoi Guardiola në konferencën për shtyp para ndeshjes.
Grupi G, na sjell përballje mjaft interesante, për më tepër takimin e dy ish-protagonistëve, Jose Mourinho dhe Iker Casillas gjatë kohës që ishin pjesë e Real Madridit. Por, kësaj radhe ata do mbrojnë petkun e dy skuadrave të tjera, Mourinho të Chelsea-it dhe Casillas të Porto-s. 
Para sfidës, Mourinho ka premtuar që do ta përshëndesë Casillasin, pavarësisht marrëdhënies jo fort të mirë të krijuar gjatë kohës sa ishin në Madrid.
“Nuk është duel Mourinho-Casillas, por Porto-Chelsea. Unë do ta përshëndes Casillasin, para ndeshjes dhe në fundin e saj nuk është ndonjë problem për mua dhe mendoj se kjo temë duhet të përfundojë njëherë e mirë. Sa i përket ndeshjes do jetë mjaft e vështirë, pasi përballë kemi një skuadër të fortë siç është Porto, por ne futemi në çdo ndeshje për fitore”, u shpreh Mourinho para sfidës ndaj Portos.
Në duelin tjetër ballafaqohen Maccabi Tel Aviv-Dynamo Kiev.
Në grupin H, Lyon dhe Valencia marrin epitetin e ndeshjes derbi para sfidës tjetër ndërmjet Zenitit dhe skuadrës belge Gent.
Të gjitha ndeshjet fillojnë nga ora 20:45. /tesheshi.com/
