Arsenal-i duhet t’ia dijë për nder tregolëshit të francezit Olivier Giroud që i fundosi grekët e Olympiacos-it në një ndeshje të mbyllur 0-3, për t’i rrëmbyer pozitën e dytë, e cila i dërgon topçinjtë në fazën tjetër të garave. Në ndeshjen tjetër të grupit F, Bayern Mynih-u ka kryer detyrën në Kroaci përballë Dinamo Zagreb-it (0-2), duke u klasifikuar si i pari i grupit.
Një tjetër skuadër londineze, Chelsea, ka kapur trenin e fundit për t’u kualifikuar në 1/8 e aktivitetit. Skuadra e drejtuar nga Jose Mourinho ka shfaqur një tjetër fytyrë në Ligën e Kampionëve në dallim nga kampionati anglez, duke i mposhtur 2-0 së fundmi portugezët e Porto-s. Epilog ky që i pozicionon blutë në kreun e tabelës, ndërkohë që portugezët i zbret në Ligën e Europës. Dynamo Kyiv-i nuk ka lënë asgjë në dorë të fatit përballë Maccabi Tel Aviv-it (1-0), për t’u kualifikuar si e dyta e grupit G.
Një befasi mjaft e këndshme e mbrëmjes të së mërkurës vjen nga skuadra belge e Gent-it, e cila siguron një kualifikim historik për në fazën tjetër të garës të Champions League-s pas fitores 2-1 në shtëpi ndaj Zenit St.Petersburg-ut. Ndërkohë, Valencia mjaftohet me Ligën e Europës, meqenëse ngriti flamurin e bardhë në “Mestalla” përballë Lyon-it, (0-2).
Roma e ka kaluar fazën e grupeve në mënyrën tipike italiane. Me një fitore, tri barazime dhe dy humbje, romakët renditen në pozitën e dytë të grupit E. Skuadra e Rudi Garcia-s ka barazuar pa gola në sfidën e fundit ndaj bjellorusëve të Bate Borisov-it, por çka mjaftonte për të shkuar në fazën tjetër eliminatore, pasi Barcelona i bëri dhuratë nga Gjermania, duke e ndalur Bayer Leverkusen-in me një barazim 1-1. /tesheshi.com/
