Dy organizata të njohura e kanë dënuar ashpër miratimin e planit izraelit për ndërtimin e 2.500 vendbanimeve të reja në territoret e pushtuara palestineze.
Liga Arabe ka lëshuar një deklaratë ditën e djeshme, duke i denoncuar ngulimet ilegale të Izraelit.
“Ndërtimi në territorin palestinez shihet si një shkelje serioze e vazhdueshme e ligjit ndërkombëtar dhe si një sfidë e qartë ndaj vullnetit të bashkësisë ndërkombëtare,” thuhej në këtë deklaratë.
Miratimin e këtij projekti ngulimesh të reja, Liga e Arabe e sheh si një kundërpërgjigje ndaj rezolutës së votuar në Këshillin e Sigurimit të OKB-së muajin e shkuar që i kërkonte Izraelit t’i jepte fund menjëherë aktivitetit të ndërtimit të vendbanimeve ilegale në territoret palestineze.
Nuk ka munguar dhe reagimi i OKB-së, ku është theksuar se veprimet e njëanshme janë pengesë për zgjidhjen me dy shtete të konfliktit.
“Për sekretarin e përgjithshëm nuk ka plan B për zgjidhjen me dy shtete. Në këtë pikëpamje, çdo veprim i njëanshëm, që mund të jetë pengesë për objektivin me dy shtete, është një shqetësim i madh për sekretarin e përgjithshëm,” deklaroi zëdhënësi i Antonio Guterres-it.
Miratimi i planit për ngulimet e reja vjen menjëherë pasi Trump nisi të kryejë detyrën si president i SHBA-së, një veprim i nxitur me shumë të ngjarë nga ky zhvillim. /tesheshi.com/
