Liderët e Kosovës, duke filluar nga kryeministri Mustafa kanë uruar për fillimin e muajit të bekuar të Ramazanit.
Në urimin e tij z. Mustafa shpreh besimin se muaji i Ramazanit, që përfaqëson devotshmërinë, humanizmin, solidaritetin dhe përkushtimin për paqe e tolerancë, do të sjellë më shumë bashkëpunim dhe mirëkuptim ndërmjet njerëzve.
Ai duke uruar të gjithë besimtarët myslimanë, thekson nevojën për thellimin e bashkëpunimit në realizimin e synimeve të përbashkëta për fuqizimin e gjithanshëm të shtetit dhe për prosperitet të të gjithë qytetarëve të Republikës së Kosovës.
Ndërsa në një postim në Facebook ka uruar edhe Ministri i Punëve të Jashtme Hashim Thaçi, i cili ka thënë: “Nesër është dita e parë e muajit të shenjtë të Ramazanit, muajit të paqes, solidaritetit dhe përkushtimit të besimtarëve myslimanë për një edukim sa më të mirë shpirtëror. Qoftë ky një muaj i mbarë dhe i lehtë për të gjithë agjëruesit”, shkruan Thaçi në Facebook.
Nuk ka munguar as urimi i ish-kreparlamentarit Jakup Krasniqi, i cili shprehet: “Gjithë shqiptarëve myslimanë e myslimanëve të Kosovës, me rastin e muajit të Ramazanit Ju uroj agjërim të lehtë, ju dëshiroj shëndet e dashuri për njeriun e jetën, për kombin dhe atdheun!
Le të shërbej ky muaj i shenjtë, për tu përkushtuar për kombin, atdheun dhe njerëzit e tij të mirë! Le të mbretëroi dashuria mes shqiptarëve në këto kohë të vështira! Urime besimtarë të mirë”, shkruan z. Krasniqi në Facebook.
Edhe lideri i AKR-së në një postim në Facebook ka uruar besimtarët me rastin e fillimit të muajit të bekuar të Ramazanit. Në këtë urim thuhet: “Të dashur miq, pasi që jemi në prag të muajit të Ramazanit, dua që në emrin tim personal dhe të Aleancës Kosova e Re, të ua uroj të gjithë vëllezërve dhe motrave shqiptarë të besimit mysliman kudo që ndodheni, këtë muaj të shenjtë të Ramazanit”
“Dashtë Zoti të keni agjërim të lehtë, dhe paqja, mirësia, harmonia dhe begatia të mbretërojë tek ju dhe familjet e juaja, shkruan z. Pacolli në profilin e tij në Facebook. /tesheshi.com/
