Paralizimi i qeverisjes dhe paaftësia për të gjetur gjuhën e përbashkët për një zgjidhje pas mbylljes së fushës kryesore të grumbullimit e përpunimit të mbeturinave, kanë bërë që Libani të gjendet nën pushtetin e plehrave, e posaçërisht Bejruti.
Debatet politike në javët e fundit nuk e kanë lënë qeverinë të marrë vendimet e duhura, e t’i japë një zgjidhje krizës së rëndë të plehrave.
Ndërkaq, ministri libanez i Shëndetësisë ka vënë alarmin, duke deklaruar se vendi gjendet në prag të një katastrofe shëndetësore nëse nuk gjendet një zgjidhje e menjëhershme.
Uji, ajri dhe ushqimi i Libanit kërcënohen nga ndotja sipas ministrit, Vail Ebu Faur, prandaj duhen sa më shpejt masa drastike.
Rrugët e Bejrutit janë plot me male plehrash, e përngjajnë disi me ato të Napolit pak vite më parë, në një krizë të ngjashme të mosmbledhjes së mbeturinave.
Kriza është përkeqësuar teksa një pjesë e banorëve kanë gjetur si zgjidhje të pjesshme djegien e plehrave, gjë e cila ka bërë që pjesë të tëra të kryeqytetit të mbulohen nga tymi helmues. Për shkak të kësaj nuk është e habitshme që të ndeshësh njerëz pa mbarim me maska në fytyrë.
Libani është i njohur për krizat e shpeshta politike, për qeveritë e paqëndrueshme, e për ndasitë e thellë fetare, rezultat i të cilave është dhe gjendja aktuale katastrofike./tesheshi.com/
