David De Gea mund të jetë i zhgënjyer për shkak të moskalimit te Real Madridit, mirëpo ai nuk është i vetmi i cili nuk ka mundur ta përfundojë transferimin për shkak të dokumentacionit. Probleme të tilla pati edhe Roberto Soriano, futbollist i Sampdorias që nuk arriti të bashkohet me Napolin në çastet e fundit të merkatos.
“Koha është flori”. Kjo thënie sigurisht se do t’i përshtatej më së miri drejtuesve të Real Madridit që nuk arritën të shfrytëzojnë kohën në dispozicion për ta transferuar portierin spanjoll David De Gea nga Manchester United. Dokumentacioni për transferimin e tij erdhi pas mbylljes së merkatos. Kështu Federata e Futbollit Spanjoll nuk ka pranuar regjistrimin e tij.
Rast i ngjajshëm ndodhi edhe me drejtuesit e Napolit që nuk arritën në kohë të kompletonin dokumentacionin e futbollistit të Sampdorias, Roberto Soriano. Pas mbylljes së afatit të merkatos kishin arritur adresat, mirëpo tashmë ishte bërë vonë dhe Soriano do të mbetet në skuadrën aktuale.
Fabio Coentrao është një tjetër rast. Portugezi nuk kishte arritur të kompletonte dokumentacionin nga Real Madrid për t’u transferuar në Old Traford tek Manchester United dhe kështu mbeti pjesë e madrilienëve sezonin e shkuar. Kjo mund të shihet edhe si një hakmarrje e djajve ndaj klubit mbretëror për shkak se ata vepruan me futbollistin portugez në të njejtën mënyrë. /tesheshi.com/
