Kreu i partisë Demokratike, Lulzim Basha njoftoi pjesëmarrjen në punimet e asamblesë Politikë të partisë Popullore Europiane ku ai do të rikthejë temën e zgjedhjeve të 21 Qershorit dhe cënimit të standarteve. Me anë të një postimi në Facebook, Basha zbulon axhendën e bisedimeve që do të ketë me përfaqësues të së djathtës europiane, drejtues të parlamentit dhe komisionit Europian.
Në këto takime, Basha shprehet se pret të marrë mbështetje “për një aksion të përbashkët për të ndalur përmbysjen që kjo qeveri po u bën standardeve demokratike në Shqipëri”.
Partia Demokratike ka dorëzuar aplikimin për t’u bërë anëtare me të drejta të plota e PPE-së.
“Në qendër të diskutimeve zgjedhjet e 21 Qershorit, ku shqiptarëve iu cënuan zgjedhjet e lira nga dyshja Rama-Meta dhe bandat e tyre, blerja e votes, kokëfortësia e qeverisë për të mos e zbatuar marrëveshjen e heqjes së kriminelëve nga Parlamenti dhe kandidimi i krimineleve, si dhe kriza ekonomike që po detyron mijëra shqiptarë të largohen çdo muaj nga vendi”, shkruan Basha Facebook. /tesheshi.com/
