Aktivistët e lëvizjes “Ti kutërbon” në Liban kanë pushtuar ministrinë e Mjedisit, në një protestë të fundit kundër mbushjes së rrugëve të kryeqytetit Bejrut me plehra.
Në një video të postuar në rrjetet sociale, tregohen radhë me njerëz të ulur në dysheme dhe që kërkojnë dorëheqjen e ministrit të Mjedisit, Mohammed Machnouk.
Një lëvizje e tillë vjen pas javësh proteste në lidhje me paaftësinë e qeverisë për të pastruar grumbullimet e plehrave në rrugë.
Protestuesit kërkojnë gjithashtu, edhe zgjedhje të parakohshme parlamentare. Të martën, ata hynë në ministri, duke e zhvendosur aty protestën e tyre të uljes deri në plotësimin e kërkesave.
Ata thonë se do të qëndrojnë aty deri në dorëheqjen e ministrit Machnouk.
Më herët, lëvizja “Ti kutërbon” i kishte dhënë ministrit ultimatum 72-orësh për të dhënë dorëheqjen.
Plehrat janë lënë në rrugët e Bejrutit që prej mbylljes së qendrës së grumbullimit në korrik, pa pasur alternativë tjetër për sistemimin e tyre.
Një gjë e tillë solli edhe formimin e lëvizjes “Ti kutërbon” e cila fajëson paralizën politike të vendit dhe korrupsionin për pamundësinë e zgjidhjes së krizës së plehrave.
Libani ka qenë pa president për më shumë se një vit, ndërsa deputetët e parlamentit zgjatën mandatin e tyre deri në 2017-ën pasi dështuan të arrinin marrëveshje për ligjin e zgjedhjeve të reja. /tesheshi.com/
