Konflikti politik në Shqipëri po kthehet gjithnjë e më shumë në atë që realisht është: krizë përfaqësimi.
Këto ditë të 25-vjetorit të lëvizjes studentore në Shqipëri, po prezantohet një nismë e re e cila ka si protagonistë zemrën e revoltave të 1990-s, por edhe pjesën më të edukuar dhe doktoruar të diasporës.
Por e gjithë kjo valë politike nuk vjen si një rastësi por si një zhvillim edhe i koordinuar nga kancelaritë e Shteteve të Bashkuara të Amerikës. Jo rastësisht ata janë intervistuar periodikisht nga Zëri i Amerikës, organ zyrtar i Departamentit të Shtetit.
Shinasi Rama, Grid Rroji dhe Valbona Karanxha, kanë prezantuar sot një nismë që synon të përfaqësojë në politikën shqipare ata që deri më tani kanë qenë të mënjanuar.
Duke u përgjigjur pyetjes së tesheshi.com, Shinasi Rama tha se koncepti i tyre politik synonte shtetin-kombin dhe projektin e Rilindjes Kombëtare.
Rama tha se modeli i tyre më i afërt është Lëvizja Vetëvendosje në Kosovë dhe Aleanca Kuqezi në Shqipëri në konceptin fillestar të saj, pa u personalizuar.
Kjo linjë e lidhur me AK-në u pa hapur edhe me pjesëmarrjen e sekretarit të Aleancës Kuqezi, Ermir Dymleku, i cili, theksoi se kjo forcë politike do të riorganizohet në një formë të re që do të përfshijë pjesë nga intelektualët e diasporës.
Por profesori i Universitetit të Nju Jorkut, tha se koncepti i tyre në politike nuk është hapja e konfliktit por marrja e konsensusit.
“Shqiptarët që jetojnë jashtë janë shumë dhe po shtohen gjithnjë e më shumë dhe ata po e gjejnë ‘të xanun’ tokën politike duke u ngushtuar hapësirat e tyre”, tha Rama për tesheshi.com.
/tesheshi.com/
