Sot në vazhdimin e seancës Kuvendi i Kosovës ka miratuar në parim Projektligjin për Avokatin e Popullit.
Në favor të këtij projektligji kanë votuar 59 deputetë, kundër 12 dhe 3 kanë abstenuar.
Ministri i Punës dhe Mirëqenies Sociale, Arban Abrashi, i cili e ka prezantuar projektligjin për Avokatin e Popullit ka thënë se synimi i këtij projektligji është promovimi dhe mbrojtja e të drejtave dhe lirive të njeriut.
Sipas Abrashit me miratimin e këtij projektligji Kosova përmbushë një nga kërkesat e Komisionit Evropian për liberalizimin e vizave.
“Ky projektligj i përcaktuar në programin legjislativ të Qeverisë së Kosovës për vitin 2015, ka për qëllim krijimin e një kornize si dhe përcaktimin e standardeve më të larta për promovimin dhe mbrojtjen e të drejtave dhe lirive të njeriut si dhe eliminim e vështirësive që ka hasur në praktike institucioni i Avokatit të Popullit”, është shprehur Abrashi.
Më tutje deputetët e Kuvendit kanë miratuar në parim edhe Projektligjin për barazi gjinore, atë për mbrojtje nga diskriminimi Projektligjin për Provimin e Maturës Shtetërore.
Ndërsa, Projektligji për festat zyrtare nuk është votuar nga shumica e deputetëve të Kuvendit të Kosovës. Për këtë projektligj kanë votuar 50 deputetë, ndërsa kundër 20 prej tyre. Për të kaluar Projektligji për festat zyrtare është dashur që të votojnë 60 deputetë./tesheshi.com/
