Me 79 vota për , 14 abstenime dhe me asnjë kundër, Kuvendi i Kosovës, në orët e para të mëngjesit të sotëm e ka miratuar projektligjin për “Trepçën”.
Si rrallë herë ky projektligj bëri bashkë pozitë e opozitë, por ndau PDK e LDK-në me partnerin e tyre qeverisës, Listën Serbe.
Brenda një seance maratonike që zgjati rreth 14 orë është miratuar në lexim të parë dhe të dytë ligji që e bën qeverinë e Kosovës me 80 për qind dhe punëtorët me 20 për qind aksionarë të gjigantit ekonomik të Kosovës.
Vërejtjet më të mëdha për ligjin i kanë pasur deputetët e lëvizjes Vetëvendosje që ka kërkuar që Trepça të quhet ndërmarrje publike, por porpozim ky që nuk u përkrah nga partitë në pushtet. Kështu, në fund deputetet e VV-së abstenuan.
21 amendamente janë paraqitur nga deputetët dhe grupet parlamentare të cilat për rreth 4 orë u shqyrtuan në komisionin për zhvillim ekonomik, infrastrukturë, tregti dhe industri.
Deputetët e Listës Serbe nuk ka marrë pjesë në votim, ndërsa Marko Gjuriq sot do të mbajë një konferencë të jashtëzakonshme, ku do të flas rreth miratimit të ligjit në fjalë. /tesheshi.com/
