Ambasadorja amerikane Yuri Kim, i është gëzuar fuqishëm rikthimit të Gjykatës Kushtetuese pas tre vitesh mungesë. Gjykata është plotësuar me 6 anëtarë pas dekretimit prej presidentit Meta të Përparim Kalos, propozuar nga KED, gjë që e bën Kushtetuesën funksionale.
“Lajm i madh!
Presidenti Meta ka dekretuar Përparim Kalon si gjyqtar të 6-të të Gjykatës Kushtetuese. Sapo Kalo të bëjë betimin nesër, do të ketë kuorum. Shqipëria do ta përmbyllë vitin 2020 me një Gjykatë Kushtetuese funksionale- pas gati 3 vitesh.
Presidenti, KED dhe Parlamenti kanë një meritë të madhe!
Ky ishte një veprim urgjent nga udhëheqësit, në përputhje me opinionin e Komisionit të Venecias.
Me një Gjykata Kushtetuese funksionale, Shqipëria tani plotëson 1 nga 2 kushtet për hapjen e negociatave për anëtarësimin në BE.
Ky është një hap gjigant përpara. Urime popullit të Shqipërisë! Le të vazhdojmë të ecim përpara”, shkroi Kim në Tëitter.
Por sa vlen Kushtetuesja me 6 anëtarë ndërkohë që duhen 9 gjithsej.
Kreu i Komisionit Parlamentar të Ligjeve, Ulsi Manja, tha në Top Talk në TCH se “numri prej i 6 anëtarëve nga nëntë e bën funksionale zhvillimin e mbledhjes plenare të Gjykatës Kushtetuese sepse merr vendimmarrje në dhomë këshillimi apo mbledhje plenare kur çështjet kalojnë për gjykim”.
Manja vijoi: “6 është kuorum i kërkuar nga ligji, por që të kemi një vendimmarrje për çështje të rëndësishme duhet të kemi vendimmarrje 6 me 1 ose 6 me 0 në kushtet 4 me 2 nuk kemi vendimmarrje. Ajo që është e rëndësishme që me dekretimin nga presidenti të anëtarit të 6 të Gjykatës Kushtetuese nuk mund të flitet që Shqipëria nuk është pa Gjykatë Kushtetuese”, arsyetoi Manja. /tesheshi.com/
