Nga Blendi Gashi
Sulmet me bomba ndaj institucioneve në Kosovë, si Kuvendit, shtëpisë së kryetarit të komisionit qeveritar për Demarkacionin, Murat Meha, dhe së fundmi sulmi ndaj televizionit publik (RTK) është një dëshmi e qartë se shteti i Kosovës ka hyrë në një krizë të thellë me sinjale frikësuese të përshkallëzimit të mëtejmë të situatës.
Këto sulme janë bërë përditshmëri muajt e fundit dhe kryerësit e veprave të tilla që po rrezikojnë jetërat e qytetarëve po vazhdojnë të shëtisin lirshëm, pasi institucionet përgjegjëse të sigurisë, më në krye, ministrin e Brendshëm, Skënder Hyseni dhe kryepolicin Shpend Maxhuni, po flejnë qetë, thuajse asgjë nuk po ndodh.
Se situata po shkon drejt përkeqësimit me mundësi eskalimi të thellë, dëshmoi edhe sulmi që u bë ndaj fjalës së lirë, televizionit publik (pavarësisht se mendiumi në fjalë mund të meritojë kritika, si edhe televizione tjera, por të gjuhet me bombë?!), ku brenda objektit qëndronin një numër jo i vogël punëtorësh, si gazetarë, kameramanë, e staf tjetër, jeta e të cilëve mbrëmë u rrezikua tej mase.
Prandaj, duke parë se sulmet e tilla, çdo ditë e më shumë po rriten, institucionet përgjegjëse përveç deklaratave të kota nga drejtuesit e shtetit, konkretisht institucionet e sigurisë duhet të zgjohen nga gjumi i thellë, dhe të kapin kryerësit e sulmeve të tilla, para se ndonjë qytetarë i pafajshëm të humb jetën.
“Të kapen autorët, ose të dorëhiqet ministri i Brendshëm”
Njohës të sigurisë, politikanë dhe gazetarë, thonë se sulmet e tilla nuk duhet lejuar të bëhen përditshmëri, derisa ftojnë organet e rendit të zbardhin sa më parë sulmet që po ndodhin.
Eksperti i sigurisë, Hajrullah Tërnava, thotë se sulmet që po ndodhin së fundmi në vend, duhet jo vetëm të ndalohen por edhe të zbulohen dhe të dënohen akterët- vepërkryesit.
“Përdorimi i armëve të rënda, si granata dore që mbrëmë u sulmua RTK-ja, apo para ca ditëve, me zolë Parlamenti i Kosovës, është situate për shqetësim dhe tregon për jo efikasitetin e organeve ndjekëse. Gjithçka mund të ndodh dhe qytetarët pas këtyre sulmeve mund të ndihen të pasigurt. Policia duhet të bëj punën e saj dhe të tregohet më efikase, në të kundërtën udhëheqësia e saj, duke filluar nga minsitri Skender Hyseni dhe me radhë duhet të japing dorëheqje”, thotë eksperti Tërnava, për tesheshi.com.
Burim Ramadani, po ashtu njohës i çështjeve të sigurisë, sulmin ndaj RTK-së e quan tronditës dhe të papranueshëm.
“Mos të lejohet që sulmet të bëhen përditshmëri! Për më keq, tashmë janë bërë një varg sulmesh dhe nuk është zbardhur asnjë prej tyre. Nuk janë kapur autorët dhe nuk është dhënë asnjë dënim ligjor. Në një situatë të këtillë, po e shkruaj ndoshta për të njëmijtën herë: Kosova po ofron lehtësisht ambientin për përkeqësim të sigurisë.
Prandaj, është e domosdoshme platforma e përbashkët nacionale për rrugën përpara. Dhe, jo vetëm në një çështje. Jo vetëm për demarkacionin. Vendi ynë ka shumë çështje për të cilat duhet të ndërtohet platformë nacionale politike. Për ta ruajtur qëndrueshmërinë e shtetit dhe për ta orientuar atë në binarë të rregullt”, ka thënë Ramadani, për tesheshi.com.
“Sulmet ndaj mediave, kur ka përpjekje për puç”
Profesori i degës së gazetarisë, Milazim Krasniqi thotë se sulmet ndaj televizioneve bëhen zakonisht kur ka përpjekje për puç.
Ai ka thënë se me sulmin ndaj RTK-së ka lindur dilema se dikush po i shfrytëzon kontekstet politike për të nxitur dhune e për ta çuar Kosovën drejt dështimit, ose dikush mund ta ketë marrë rolin e armikut të Kosovës dhe po don ta çojë vendin drejt dështimit.
“Sidoqoftë, të gjithë duhet ta ruajmë gjakftohtësinë e të presim me durim rezultatin e hetimeve. Vetëm shteti duhet të mos presë, po duhet të veprojë me vendosmëri”, thotë Krasniqi.
Edhe gazetari Adriatik Kelmendi, thotë se organet e rendit duhet të zgjohen nga gjumi dhe t’i demaskojnë vandalet e tilla.
Kelmendi përmes një shkrimi në Facebook, thotë se nëse gjuajtja me bomba ndaj mediave është ‘vepër’, siç i quan ai të patriotave për ta mbrojtur Kosovën, pyet se si as për 50 vjet askush nuk e gjuajti një gur në drejtim të Televizionit të Beogradit?
“Jo, jo! Këtu disa njerëz i ka qorru pushteti. Një grup që ka kapur shtetin do ta ruajë me çdo kusht, një grup tjetër do ta kapë për vete, e nje grup ende mendon se këtu është Serbi (s’është larg mendsh që dallditë tona t’i shfrytëzojnë për kaos).
RTK-ja gjithësesi se mund të meritojë kritika, por bomba?!!!.
Organet e rendit duhet të zgjohen nga gjumi shpejt e t’i demaskojnë vandalet të kujtdo qofshin.
Nëse s’kthjellemi, mos u frikësoni – gjithmonë ndodhë diçka që na kthjellë s’hundesh!”, ka deklaruar Kelmendi.
Ndryshe, përgegjësinë e sulmit ndaj RTK-së e kanë marrë të ashtuquajturit “Rugovasit”, me ç’rast kanë dhënë disa arsye pse e kanë bërë një akt të tillë, ku një prej tyre thuhet se “RTK-ja për çdo ditë transmeton lajme pro Demarkacionit dhe pro qeverisë”, duke paralajmëruar se sulmet e tyre do të ashpërsohen edhe më shumë nëse qeveria s’ndalet siç thonë për të shitur tokën e shtetit. /tesheshi.com/
