Nga Blendi Gashi
Përplasjet mes partive politike në Kosovë që nga paslufta janë një gjë e zakonshme.
Por muajit e fundit, sidomos gjatë krizës politike në Kosovë, më së shumti u shtrua pyetja: kush e po e rrezikon Kosovën?
Përgjigja në të shumtën e rasteve, sidomos nga taborri opozitar është: nepotizimi, korrupsioni e krimi i organizuar, pra “kapja e shtetit”.
Ndërsa, partitë në pushtet gishtin e drejtojnë kah opozita, për rrezikim të ardhmes së shtetit, e në veçanti më së shumti sulmohet Lëvizja Vetëvendosje për rrezikim të jetës së qytetarëve dhe vet Republikës, por që mohohet nga kjo e fundit.
Por, lëvizja që e themeloi vite më parë Albin Kurti e që tani udhëhiqet nga Visar Ymeri, nuk po sulomohet vetëm nga partitë në pushtet (vlen të theksohet deklarata e deputetës së LDK-së Besa Gaxherri e cila gjatë një fjalimi në Kuvend e cilësoi si lëvizje terroriste VV-në), por së fundmi është kritikuar fort edhe nga analistë të huaj.
Serwer: Kosova rrezikohet nga Vetëvendosje dhe serbët, jo nga Rusia
Është analisti amerikan, Daniel Serwer ka dhënë mendimin e tij se prej kujt rrezikohet shteti i Kosovës.
Serwer nuk mendon se Kosova rrezikohet nga elemente të jashtme si Rusia që tenton të shkaktojë trazira në Ballkan, apo nga ndonjë sulm terrorist, por analisti amerikan thotë hiç më pak se Kosova rrezikohet nga partia e parë opozitare Lëvizja Vetëvendosje dhe nga serbët, duke mos pranuar integritetin territorial të shtetit.
“Kosova ka probleme të vazhdueshme të integritetit territorial dhe sovranitet të saj. Që të dyja këto kërcënohen nga njëra anën prej serbëve që nuk e pranojnë pavarësinë dhe sovranitetin e Kosovës e nga ana tjerët nga vet shqiptarët, nga Vetëvendosje që nuk e pranojnë integritetin territorial dhe sovranitetin e Kosovës”, deklaroi Serwer në një intervistë për televizionin publik.
VV: deklarata e Serverit e pavërtetë dhe e pa menduar mirë
Pavarësisht deklaratës së Serwer, si Lëvizja Vetëvendosje dhe analistët thonë se shteti dhe e ardhmja e tij po rrezikohet nga partitë në pushtet PDK e LDK, pasi ato kanë kapur shtetin.
Por në Vetëvendosje thonë se nuk e kanë dëgjuar ende të plotë intervistën e dhënë nga analisti Serwer por nëse një veç ka dhënë një deklaratë të tillë atëherë ka thënë një të pavërtetë.
Shkodran Hoti, nga zyra për media e Vetëvendosje-s thotë se një delaratë eventuale e tillë përveç që është e pavërtetë, njëherit është edhe e pamenduar mirë.
“Në të vërtetë shtetin e Kosovës e rrezikojnë marrëveshjet e dëmshme me Serbinë, që janë imponuar nga qeveria. Në njërën anë është ‘Zajednica’ dhe Demarkacioni, e jo një subjekt që i lufton këto marrëveshje që i sjellin dëm vendit.
Përveç këtyre dy marrëveshje, shtetin e rrezikon edhe krimi i organizuar, korrupsioni që e ka mbjell çdo qeveri e pasluftës, dhe afera ‘Pronto’ e pasqyron më së miri gjendjen në të cilën gjendet shteti i Kosovës. Pra, në pushtet është një klasë oligarkike që nuk e ka në interes shtetin e Kosovës por rehatimin e familjarëve dhe marrëveshjet që përmenda më lartë që të mbesin në pushtet”, thotë Hoti, përtesheshi.com.
“Kosovën po e rrezikojnë partitë në pushtet”
Analistët politikë pajtohen me analistin Server veç me pjesën ku thotë se Serbia e rrezikon Kosovën, por assesi me atë se e rrezikon edhe Vetëvendosje.
Analisti politik, Faik Krasniqi, thotë se për serbët pajtohet që janë duke e rrezikuar Kosovën, megjithatë thotë se ata janë pakicë dhe shqiptarët si shumicë s’duhet të kanë aspak frikë prej tyre.
“Me gjithë respektin për z.Serwer, nuk pajtohem aspak se Vetëvendosje është duke e rrezikuar Kosovën. Shteti s’mund të rrezikohet nga një parti që është në opozitë. Shteti rrezikohet nga partitë në pushtet, e shteti ynë prej pasluftës është në rrezik nga partitë në pushtet, nga këto parti që e kanë kapur shtetin keq për fyti, gjëra që nuk i ka përmendur fare një analist i kalibrit të madh ndërkombëtar siç është i respektuari z. Daniel Serwer. Një analist i këtij kalibri, nuk guxon të përdor standarte të dyfishta, për ndonjë parti nënë e për ndonjë parti njerkë. Gjendja e mjerueshme në Kosovë, tregon se kush po e rrezikon shtetin tonë!”, thotë analisti Krasniqi për tesheshi.com.
Njohësi tjetër i rrethanave politike në vend, Arsim Haziri, thotë se është për t’u shqetësuar se si një njohës i çështjeve politike të jep deklarata të tilla.
Analisti Haziri thotë se është e vërtetë se Kosova vazhdueshëm dominohet prej problemeve të brendshme që e përbëjnë sovraniteti dhe integriteti territorial, por jo për fajin e Vetëvendosje-s ose serbëve por për fajin e mungesës së një klase politike kredibile dhe të përgjegjshme ndaj çështjeve vitale.
“Çështja e problemeve të brendshme lidhet kryekëput me mungesën e një liderëve të mirëfilltë shtetërorë dhe jo me forcat tjera opozitare. Politika jo e drejtë dhe konsoliduese është mundësi e shteteve tjera që të shtrijnë ndikimin në masë të gjëra. Mendoj se Kosova rrezikohet nga politika aktuale, e cila në mungesë të synimit të përgjithshëm krijonë hapa për interesin klanorë. Qëndrimet e analistit Serwer konsideroj se janë të pa baza dhe objektive që për një analist të tillë është për keqardhje”, thotë Haziri, për tesheshi.com
