Klodian Rasha është i riu i qëlluar natën vonë nga policia në Laprakë, i cili ndërroi jetë në spital. Nga të dhënat e para rezulton që ai të ketë qenë dhe më parë me precedentë penalë – plagosje me dashje dhe pengmarrje, për të cilat kanë qenë dhe i dënuar pak vite më parë.
Sipas policisë, atij i është gjetur një armë, me të cilën mendohet se ia ka drejtuar efektivëve të një patrulle, gjë që detyroi uniformat blu që ta qëllonin.
“Në vijim të veprimeve hetimore të kryera nga Grupi i Posaçëm Hetimor i përbërë nga SHÇBA dhe Policia nën drejtimin e Prokurorit gjatë kqyrjes së vendit të ngjarjes dhe zonës përreth u bë e mundur gjetja e armës së zjarrit që dyshohet se i përkiste shtetasit K.R, i cili nuk iu bind urdhërit të Punonjësit të Policisë për të ndaluar.
U sekuestrua në cilësinë e provës materiale armë e zjarrit pistoletë me një krehër me fishekë. Vijon puna intensive nga grupi hetimor nën drejtimin e Prokurorit për zbardhjen e plotë të dinamikës së ngjarjes”, thuhet në deklaratën policore. /tesheshi.com/
