Kryeministri Kurti deklaroi se Serbia pasqyron stilin autoritar të Rusisë dhe se strategjia e saj është të krijojë tensione në Kosovë dhe të kërkojë ndarjen e Bosnjës.
Gjatë panelit të diskutimit online në kuadër të Forumit të Integrimit Ballkanik 2024, ai tha se sfidat me të cilat përballet rajoni janë të ndërthurura me kontekstin më të gjerë të ndryshimeve globale në aspekte të ndryshme politike dhe gjeopolitike.
“Agresioni i Rusisë kundër Ukrainës zbuloi rreziqet që vijnë nga regjimet autoritare. Serbia sot në Ballkanin Perëndimor pasqyron stilin autoritar të Rusisë. Strategjia e saj është të krijojë tensione në Kosovë dhe të kërkojë të ndajë Bosnjën, duke i përdorur ato si mjet për të negociuar me Perëndimin për të siguruar koncesione dhe për të shmangur reformat e nevojshme”, tha kryeministri i Kosovës.
Sipas tij, duhet normalizimi i vetë Serbisë “e cila duhet të pajtohet me faktin se koha e zgjerimit territorial dhe ndarjeve etnike ka përfunduar”. Ai nënvizoi se Kosova është e përkushtuar për marrëdhënie të mira fqinjësore dhe bashkëpunim rajonal dhe se vazhdon të punojë drejt anëtarësimit në NATO dhe BE si synime strategjike.
Ai shtoi se Kosova në tre vitet e fundit ka shënuar rritjen më të shpejtë të treguesve demokratikë në rajon dhe rritje të lartë ekonomike, “duke treguar se demokracia dhe zhvillimi ekonomik shkojnë paralelisht”.
Ministri i Jashtëm i Malit të Zi Filip Ivanoviç, anëtari i Presidencës së Bosnjës Zheljko Komshiç, Përfaqësuesi Special i BE-së për dialogun Kosovë-Serbi dhe çështjet e Ballkanit Perëndimor Miroslav Lajçak, eurodeputeti Tonino Picula dhe kryediplomatja sllovene Tanja Fajon morrën pjesë në panel.
Kërkesat e Vuçiçit
Presidenti serb Aleksandar Vuçiç kumtoi dje sot se formimi i Unionit të Komunave Serbe (ZSO) në Kosovë dhe shpallja e zgjedhjeve të lira dhe demokratike në veri të Kosovës, janë pjesë e kërkesave të Beogradit për normalizimin e situatës dhe përparimin në dialogun me Prishtinë.
Në një fjalim të tij për publikun, ai ka përfshirë kthimin e serbëve në Pplicinë e Kosovës në veri, si dhe tërheqjen e forcave speciale të Policisë së Kosovës prej aty.
“Dëshirojmë të kthehemi në gjithçka që është arritur në procesin e dialogut”, tha Vuçiç. /tesheshi.com/
