Lideri i Lëvizjes Vetëvendosje, Albin Kurti, nga foltorja e Kuvendit i ka bërë thirrje kreut të PDK-së, që të kandidojë për postin e kryekuvendarit.
Madje Kurti ka theksuar se ishte pikërisht Kadri Veseli, i cili nuk pati guximin të kandidojë për kryeministër të vendit, nuk ka guxim që sërish të garojë për të parin e Parlamentit.
“Kemi dëgjuar se Veseli është kandidati i PAN-it për Kuvend, urdhëroni zoti Veseli, përballuni me votën. Propozojeni dhe le të matet a i ka votat. Kuvendi duhet të formohet, salla është plotë.
Në zgjedhje nuk hyre si kandidat për kryeministër, tani nuk përballesh me votë për të parin e Kuvendit. Kosova po humb shumë nga e gjith kjo çfarë po bën PDK. Gjendemi përballë krizës energjetike, për shkak të menaxhimit të keq, jemi të izoluar për shkak të korrupsionit dhe mosluftimit të tij.
Kosova është vendosur në listën e zezë për shkak të mos respektit të ligjit. Shumica e ndërmarrjeve publike e rajonale janë në prag të falimentimeve”, ka thënë Kurti.
Ai i bëri thirrje të gjithë deputetëve të mblidhen e ta thyejnë bllokadën.
“Kosova duhet të ecë përpara. Kuvendi nuk duhet të mbetet pa kryetar për shkak të PDK-së. Shumica jonë e deputetëve le të propozojnë një kandidat për pozicionin e të parit të Kuvendit, e më pas t´a zgjedhim atë person.
Duhet respektuar rregulli që Gjykata Kushtuese varet nga Kushtetuta dhe jo anasjelltas. Secili grup që ka shumicën e nevojshme për të zgjedhur kryetarin e Kuvendit, që i ka 61 vota apo më shumë.
Ndryshe në rastin e zgjedhjes së kryeministrit ky rregull nuk ofron zgjidhje, për ndonjë bllokim të mundshëm. Nëse PAN bojkoton seancën dhe refuzon të propozojë kandidatin e saj, le të votohet i joni.
Nëse PAN propozon atëherë secila parti të bëjë zgjedhjen e vetë. Nëse kandidati nuk merr votat e duhura, atëherë kandidati ynë i përbashkët votohet në seancë.
Ne jemi të hapur për çdo propozim sa i përket kandidatit të Kuvendit. Nëse nuk i ka votat Veseli jam i bindur se në mesin tuaj ka njerëz më të votuar se Veseli për t’u bërë kryetar i Kuvendit. Ai person duhet të zgjidhet si i respektuar dhe sa më pak i anshëm. Pas zgjedhjes së kryetarit të Kuvendit duhet ti shkruajmë letër Presidentit, që të propozohet kandidati për kryeministër. Presidenti do ta bënte këtë sepse përndryshe do të rrezikonte të shkelte Kushtetutën”, deklaroi Kurti. /tesheshi.com/
