Kryeministri Kurti iu drejtua serbëve me një fjalim publik, duke u thënë se e kupton që situata nuk është e lehtë dhe, duke u kthyer në zgjedhjet e fundit tha se ishte i sigurt se Aleksandar Jabllanoviç do të fitonte në Leposaviq, por ai u largua nga gara më 21 prill, dy ditë para një fitoreje të sigurt.
Ai hodhi dyshime për këtë rast, duke thënë se ka dëgjuar se Jabllanoviç ka marrë një milion euro dhe dy apartamente në Beograd.
“Ndoshta nuk është e vërtetë, por duhet të ketë pasur shumë presion apo ofertë shumë luksoze, për shkak të së cilës Jablanoviç tha se nuk do ta ‘gjuajë penalltinë menjëherë’”, tha Kurti.
Kryeministri i Kosovës tha se e di që situata nuk është aspak e lehtë dhe se të gjithë kanë frikë nga ngjarje të mundshme të paparashikueshme në të ardhmen e afërt.
“E di që në tre javët e fundit kemi qenë edhe në lajmet ndërkombëtare, duke u paraqitur në një dritë jo aq të mirë. Por le të shkojmë me radhë. Më vjen keq që u desh të mbajmë zgjedhje në katër komuna në veri me një pjesëmarrje kaq të ulët. Më 10 dhjetor të vitit të kaluar, ne e shtymë ditën e zgjedhjeve për katër muaj, me shpresën se Lista Serbe do të merrte pjesë. Bashkësia ndërkombëtare na premtoi se nëse e pranojmë aneksin e Ohrit, do të sigurojnë pjesëmarrjen e Listës Serbe në zgjedhje”, tha Kurti.
Ai shtoi se përfaqësuesit e Listës Serbe, por edhe Jabllanoviç, kanë thënë gjithfarë për Kosovën dhe për të, por se ai ka mbetur i gatshëm t’i pranojë ata si kryetarë komunash të ardhshëm.
“Lulzim Hetemi tani është kryetar i komunës, derisa të zgjidhet një i ri. Për këtë duhen zgjedhje të parakohshme dhe një fushatë e hapur, e lirë, parazgjedhore në 4 komuna në veri. Pa një fushatë të ndershme dhe demokratike, nuk ka zgjedhje të ndershme dhe demokratike. Dhe për këtë, para së gjithash, duhet një shtet ligjor, pra një mjedis ku nuk ka frikë dhe pa kriminelë. Kjo është ajo që ne duam. Me sundimin e ligjit, gradualisht mund ta zvogëlojmë numrin e policëve në ndërtesat komunale”, tha Kurti.
Sipas tij, qeveria në Beograd është në kërkim të “kthimit të kohës”.
“Ndonjëherë duan të kthehen në kohën para qershorit 1999 kur ne u çliruam, herë para shkurtit 2008. Sulmet dhe kidnapimet e policëve, të shtënat ndaj ushtarëve të KFOR-it, sulmet e dhunshme ndaj gazetarëve nuk do të tolerohen. Një shoqëri demokratike dhe liberale nuk e toleron kulturën e dhunës”, tha kryeministri i Kosovës.
Sipas tij, Vuçiç është gati të humbasë edhe një luftë.
“Aleksandar Vuçiç sot përfaqëson gatishmërinë e Serbisë për të humbur një luftë tjetër. Unë nuk jam për luftë. Unë jam kundër luftës. Unë jam socialdemokrat. Kam vuajtur në luftë, kam qenë në robëri për më shumë se dy vjet e gjysmë. Duket se ai ka vetëm kujtime të mira nga lufta dhe ndjenja të tilla, sepse ai atëherë ishte në pushtet si ministër i Millosheviçit, dhe për dallim nga sot, ai kishte pushtet pa obligime sepse Millosheviçi mbante të gjithë përgjegjësinë”, tha Kurti ndër të të tjera. /tesheshi.com/
