Me ardhjen e sezonit të gripit, ekspertët po u bëjnë thirrje qytetarëve që të vaksinohen, por këtë sezon ata theksojnë se është më e rëndësishme ta bësh atë se kurrë më parë.
Ardhja potencialisht më e hershme e sezonit të gripit mund të jetë rezultat i masave më të relaksuara të sigurisë gjatë një pandemie dhe dobësimit të imunitetit në popullatë, pas muajsh shmangie të situatave dhe mjediseve ku përhapen viruset, paralajmërojnë Qendrat Amerikane për Kontrollin dhe Parandalimin e Sëmundjeve.
Sezoni i gripit në hemisferën veriore zakonisht fillon në tetor dhe zgjat deri në maj, ndërsa në hemisferën jugore është i pranishëm në periudhën nga prilli deri në shtator. Koha më e mirë për të marrë vaksinën e gripit sezonal – me qëllim zbutjen e rrezikut të një forme serioze të gjendjes së lidhur me gripin, shtrimin në spital ose vdekjen – është midis shtatorit dhe fundit të tetorit, rekomandojnë ekspertët e shëndetit, raporton CNN.
Ata shtojnë se edhe nëse aktiviteti i gripit është i ulët në mjedise të caktuara, popullsia atje nuk duhet të presë një rritje të papritur të numrit të personave të infektuar për t’u vaksinuar kundër gripit, pasi duhen rreth dy javë që trupi të krijojë antitrupa.
A duhet të vaksinohemi kundër gripit sezonal nëse jemi vaksinuar kundër COVID-19?
Disa besojnë se vaksinimi kundër gripit sezonal ose koronavirusit zvogëlon rrezikun për të dy viruset, por kjo nuk është e vërtetë pasi ato janë grupe të ndryshme virusesh. Vaksinimi kundër gripit sezonal është mbrojtja më e mirë kundër komplikimeve potencialisht serioze, dhe vaksinimi kundër COVID-19 është mbrojtja më e mirë kundër kësaj sëmundjeje, thonë ekspertët.
Kush mund të marrë vaksinën e gripit sezonal?
Njerëzit e moshës gjashtë muaj e lart duhet të marrin një vaksinë të licencuar të gripit të përshtatshme për moshën e tyre para fundit të tetorit. Nëse mjeku juaj nuk ju këshillon ndryshe, ju nuk duhet të vononi vaksinimin për shkak të mosdisponueshmërisë së një prodhuesi të vaksinave nëse është në dispozicion një produkt i përshtatshëm për moshën tuaj.
A mund të marrim vaksina të gripit sezonal dhe COVID-19 në të njëjtën kohë?
Qendrat Amerikane për Kontrollin dhe Parandalimin e Sëmundjeve pohojnë se nuk ka ndërhyrje në marrjen e të dy vaksinave në të njëjtën kohë, gjë që nuk ishte rasti vitin e kaluar. Sidoqoftë, ende nuk është konfirmuar nëse kjo vlen edhe për të tretën ose të ashtuquajturën doza përforcuese e vaksinës COVID.
Arsyeja pse rregulli nuk u zbatua sezonin e kaluar është sepse vaksinat COVID u miratuan vetëm në dhjetor dhe sapo po kalonin fazën e vëzhgimit të efekteve anësore.
Nëse mbajmë maska dhe praktikojmë distancën fizike, a duhet të vaksinohemi kundër gripit sezonal?
Edhe nëse mbani maskë ose praktikoni distancë fizike, duhet të vaksinoheni kundër gripit sezonal dhe COVID-19, sepse kjo është mënyra më e mirë për të mbrojtur veten dhe të tjerët.
Ekspertët thonë se vaksina është një armë e fuqishme dhe e rëndësishme në luftën kundër virusit dhe se ne duhet të shmangim situatat në të cilat virusi përhapet shpejt dhe vret dhjetëra mijëra në vit. /tesheshi.com/
