Ish-kryetari demokrat Basha ka reaguar pas nxjerrjes së një raporti amerikan ku thuhet se PD ka përfituar rreth 500 mijë dollarë financim në 2017 nga Rusia. E gjithë pesha e këtij fakti bie pikërisht mbi të, pasi është fjala për kohën kur drejtonte këtë forcë, madje duke zhvilluar aksionin opozitar të Çadrës së famshme.
Por sipas Bashës, kjo nuk është e vërtetë.
“Partia Demokratike nuk ka marrë kurrë asnjë financim të huaj e aq më pak me burim rus. Kur pretendime të tilla u qarkulluan në disa media, Partia Demokratike i kërkoi zyrtarisht drejtësisë hetimin e këtyre akuzave dhe bashkëpunoi plotësisht me drejtësinë e cila hodhi poshtë çdo pretendim për financime të huaja”, shprehet Basha.
Pra, sipas tij, amerikanët gënjejnë. E megjithatë ai thotë se është krenar për të qënit aleat me SHBA.
“Ne jemi krenarë për partneritetin e palëkundur me aleatin tonë strategjik SHBA dhe të vendosur të ecim përpara në krah të aleatëve tanë euro-atlantikë për konsolidimin e vlerave perëndimore dhe integrimin e plotë të Shqipërisë në BE”, shkruan njeriu që në këtë rast është në kundërthënie të qartë dhe naive. /tesheshi.com/
