29 të akuzuarit, pjesëtarë të grupit të Kumanovës, lidhur me rastin “Lagjja e Trimave” rrezikojnë të marrin dënim me burg të përjetshëm nga Gjykata e Shkupit. Këtë sot e ka paralajmëruar gjatë fjalimit përfundimtar prokurori maqedonas, Naum Panovski.
Sipas tij, prokuroria posedon prova të mjaftueshme se të akuzuarit për terrorizëm i kanë kryer veprat për të cilat akuzohen dhe po ashtu kanë materiale edhe për 8 të akuzuarit për ndohmë në logjistikë dhënë grupit.
“Padyshim që me këto prova vërtetohen kualifikimet juridike me të cilat ngarkohen të akuzuarit”, deklaroi Panovski.
Prokuroria gjithashtu dyshon se disa prej pjesëtarëve të grupit të Kumanovës kanë ardhur në Lagjen e Trimave për para(të holla), ndërsa një pjesë tjetër ka pasur ideale politike dhe kombëtare.
Këto akuza të Prokurorisë i kanë mohuar kategorikisht familjarët e të akuzuarve dhe avokati i tyre, Naser Raufi.
“Kërkoj nga liderët politiks të angazhohen që procesi i Kumanovës të kalojë tek Prokuroria Speciale e Katica Janevës. Le t’më del një shqiptar, më i varfëri dhe le të më tregojë se unë do të shkoj të luftoj për para. Ata kanë ardhur vetëm të bëjnë kërkesë, t’ua tërheqin vërejtjen politikanëve si çifti i Ali Ahmetit, Artan Grubit e disa të tjerë, as Menduh Thaçi nuk është më i mirë, të cilët në kurriz të popullit i kanë mbushur xhepat. Janë bërë milionerë brena natës, ndërsa populli nuk ka bukë”, deklaroi Fisnik Kabashi, babai i të akuzuarit Betim Kabashi.
Ndërsa për avokatin Naser Raufi është i pakuptimtë kombinimi i akuzave të cilat ia ka mveshur Prokuroria klientëve të tij.
“Prokuroria tha se motivi i grupit ka qenë lukrativ, interesi material apo për lekë dhe një pjesë tjetër për arsye politike dhe ideale. Mendoj se ky kombinim është një pasiguri tek prokuroria. Motivi sipas neve është vetëm kauza për popullin shqiptar”, ka thënë avokati, Naser Raufi.
Në ndërkohë që prokurori lexonte akuzat gjatë seancës së sotshme, të akuzuarit Valdet Zekaj, Rufki Dogani, Shefqet Hallaqi, lëshuan sallën në shenjë bojkoti pasi thanë që nuk mundeshin t’i dëgjojnë pallavrat e Prokurorisë dhe gënjeshtrat që i kanë shpikur.
Krasniqi – /tesheshi.com/
