Kuba: Kështu po provokon SHBA në Guantanamo

Autoritetet kubane dënuan praninë e një nëndetëseje bërthamore në bazën ushtarake amerikane në Gjirin e Guantanamos, duke thënë se ishte një “përshkallëzim provokues i tensioneve”.

“Prania e një nëndetëse bërthamore në gji, në këtë moment, na bën të pyesim se cila është arsyeja ushtarake pas këtij veprimi në këtë rajon paqësor të botës”, tha Ministria e Jashtme Kubane në një deklaratë, raporton Reuters.

Autoritetet kubane thanë se nëndetësja ishte në bazë nga 5 deri më 8 korrik, por nuk specifikuan nëse ishte e armatosur.

Në njoftimin e ministrisë kubane, ajo paralajmëron për rreziqet e qarkullimit të nëndetëseve bërthamore dhe forcave të armatosura në të gjithë Karaibet dhe shton se bazat ushtarake amerikane në të gjithë rajonin kërcënojnë sovranitetin e këtyre kombeve.

Prania ushtarake

Havana zyrtare i ka bërë thirrje Shteteve të Bashkuara që t’i japin fund pranisë së saj ushtarake në ishull, sepse, siç thotë, shërben për të “shkelur të drejtat sovrane të Kubës”.

Kuba i ka kërkuar prej kohësh SHBA-ve që të mbyllin bazën e saj detare 121-vjeçare në pjesën lindore të ishullit, së bashku me burgun ushtarak krijuar atje në 2002.

Raportuesja Speciale e Kombeve të Bashkuara për kundër-terrorizmin dhe të drejtat e njeriut, Fionnuala Ni Aolain, e cila u lejua të vizitojë Guantanamon, së fundmi i bëri thirrje qeverisë amerikane që të sigurojë trajtim të menjëhershëm rehabilitimi për burrat që torturoi, për shkak të lëndimeve të tyre të rënda fizike dhe psikologjike.

“Të gjithë këta njerëz janë të mbijetuar të torturës, i  cili është një krim unik sipas ligjit ndërkombëtar dhe ata kanë nevojë urgjente për kujdes. Tortura e thyen një person dhe synon ta bëjë atë të pafuqishëm, në mënyrë që ai të pushojë së funksionuari psikologjikisht. Në një bisedë me të burgosur aktualë dhe ish-të burgosur, vura re dëmin që iu bë atyre”, tha Aolain. /tesheshi.com/