Ukraina dhe Suedia janë dy përfaqësueset e fundit që kanë siguruar biletat për Kampionatin Europian Francë 2016. Në fakt, dy duelet e fundit të play off-it përfunduan me rezultate të barabarta, por falë epërsisë së krijuar në ndeshjet e para verdheblutë e dy vendeve zunë ulëset e fundit të avionit që dërgon për në Paris.
Ukraina pati një punë goxha të vështirë përballë Sllovenisë, pasi u gjend në pjesën më të madhe në lojës në disavantazh prej një goli, por ka qenë sërish sulmuesi Andriy Yarmolenko, ai që i ka dhuruar vendit të tij biletën për në Europian me një gol në çastet e fundit të ndeshjes. Me rezultat të përgjithshëm (3-1), Ukraina kështu eleminon Slloveninë.
Ndërkohë, Suedia në ndeshjen tjetër përballë Danimarkës, duhet t`i falenderohet sulmuesit me origjinë boshnjake, Zlatan Ibrahimoviç, që me dy gola ka firmosur kualifikimin e vendit të tij. Në minutat e fundit të ndeshjes danezët u zgjuan nga gjumi, por tashmë ishte bërë vonë. Golat e Poulsen dhe Vestergard, shërbejnë vetëm për statistika, pasi me rezultat të përgjithshëm 4-3, Suedia ecën tutje. /tesheshi.com/
