Të martën në mbrëmje janë luajtur në Europë nëntë takimet e fundit për këtë muaj të kualifikueseve të botërorit të ardhshëm.
Tre kanë qenë rezultatet më interesante të së martës. Kështu, Azerbajxhani ka barazuar pa gola në Çeki ndaj vendasve, duke vijuar ecurinë pozitive. Rezultati 0-0 i mundëson Azerbajxhanit të mbajë vendin e dytë në grupin C, me shtatë pikë, dy më pak se Gjermania e vendit të parë. Vite të tëra përpjekje duket se po japin frytet e tyre, pasi Azerbajxhani ngjan të jetë në rrugën e duhur për t’u renditur pas Gjermanisë e për të shkuar në play-off.
Mali i Zi ka fituar 0-1 në Kopenhagen ndaj Danimarkës. Goli është shënuar nga Fatos Beqiraj në minutën e 31-të. Kjo fitore e ka ngjitur Malin e Zi në vend të parë në grupin E, duke e ndarë atë me pikë të njëjta me Poloninë.
Anglia është ndalur në Ljubljanë nga Sllovenia. 0-0 ka përfunduar ky takim, me anglezët që nuk gjejnë qetësi që prej mbarimit të Europianit. Pas largimit të shpejtë të teknikut Sam Allardyce, çështje e ditës është tani lënia në stol e Rooney-t. Megjithatë, Anglia kryeson e vetme në grupin F.
Gjermania nuk e ka patur të vështirë ndaj Irlandës së Veriut, duke fituar 2-0. E treta fitore radhazi për Gjermaninë në këto kualifikuese. Veç kësaj, janë tetë gola të shënuar, e asnjë i pësuar!
Fitore të pastër ka arritur dhe Sllovakia ndaj Skocisë. Sllovakët marrin tre pikët e para pas fitores 3-0.
Norvegjia mposhti 4-1 San Marinon, Polonia fitoi 2-1 ndaj Armenisë, e Lituania doli fituese ndaj Maltës, me ndeshjen të përfunduar 2-0.
Barazimi i tretë pa gola, 0-0, u regjistrua në takimin Kazakistan – Rumani.
Ndeshjet kualifikuese për botërorin Rusi 2018 rinisin në fund të dhjetëditëshit të parë të nëntorit. /tesheshi.com/
