Abdullah el-Thani, kryeministri i qeverisë libiane të njohur në arenën ndërkombëtare, ka deklaruar mbrëmë në mënyrë të papritur dorëheqjen në një debat të drejtpërdrejtë televiziv, pak orë pas rinisjes së bisedimeve mes fraksioneve rivale në vend.
Kryeministri u gjend gjatë debatit televiziv përballë diskutimeve nervoze të qytetarëve, të cilët e bënë me faj qeverinë e tij për mungesën e një sërë shërbimeve, si të energjisë elektrike, si dhe për mungesën e sigurisë në rajonet e kontrolluara prej saj.
Siç duket kryeministri nuk ka qenë i përgatitur për një tablo të tillë, dhe i nervozuar është shprehur, “Nëse largimi im është zgjidhja, atëherë po e deklaroj atë këtu.” Njëkohësisht ai njoftoi gjithashtu se dorëheqjen e tij do t’ia paraqiste parlamentit të dielën.
Libia, e përfshirë në kaos që prej rënies së regjimit të Gadafit në vitin 2011, ka dy parlamente rivale, si dhe një sërë milicish, që përplasen për kontrollin mbi pjesë të ndryshme të vendit.
Qeveria e el-Thanit e ushtron aktivitetin në qytetin-port lindor të Tobrukut, pasi Tripoli është në duart e milicëve.
Vetë el-Thani i pati shpëtuar në maj një atentati, kur pasi doli nga ndërtesa e parlamentit, makina e tij u qëllua me breshëri plumbash. /tesheshi.com/
