Debati mbi burkinin është shtrirë gjer në Kanada, por kjo nuk do të thotë se qëndrimi i autoriteteve kanadeze mund të jetë i ngjashëm me atë të francezëve.
“Ne duhet të jemi tolerantë në Kanada,” u tha kryeministri kanadez, Justin Trudeau, gazetarëve pas një takimi me ministrat e tij.
Ai kërkoi respektim të të drejtave dhe të zgjedhjes individuale të çdo personi. “Kjo”, tha Trudeau, “duhet të jetë në krye të ligjërimit dhe debatit publik.”
Disa ligjvënës në krahinën Kuebek të Kanadasë kanë bërë thirrje për ndalimin e burkinit, një veshje për larje në det që e mbulon të gjithë trupin. Thirrja e këtyre ligjvënësve është nxitur nga një ndalim i tillë në juglindje të Francës.
Trudeau e hodhi poshtë idenë e ndalimit të burkinit në Kanada, duke thënë se kanadezët duhet të ngrihen mbi një polemikë të tillë.
“Mund të flasim në Kanada për pranim, hapje, miqësi, mirëkuptim ndaj njëri tjetrit? Çështja ka të bëjë me atë se ku po shkojmë, e në ç’po kalojmë çdo ditë në bashkësitë tona të ndryshme dhe të pasura,” u është shprehur kryeministri simpatik gazetarëve.
Trudeau ka shprehur po ashtu keqardhje për rastet kur disa qeveri në njërën anë predikojnë tolerancën, ndërsa në anën tjetër i minojnë të drejtat e individëve, duke thënë ironikisht: “Ta tolerosh dikë do të thotë ta pranosh të drejtën e tyre për të ekzistuar, me kusht që ata të mos na shqetësojnë së tepërmi.” /tesheshi.com/
