Në një fjalë të mbajtur në Institutin Jacques Delors në Paris, Manuel Valls ka bërë thirrje që BE-ja t’i japë fund hipokrizisë në lidhje me bashkimin e Turqisë me bllokun europian.
Kryeministri francez do të thoshte se zgjerimi i BE-së nuk do të vazhdojë pafundësisht, e ndonëse shtete ballkanike do të jenë në gjendje t’i bashkohen një ditë, vendet europiane duhet të ndalen në një pikë të caktuar.
“Çështja e Turqisë është sigurisht në mendjen e çdokujt. Duhet të hiqet dorë nga qëndrimi dyfytyrësh mbi anëtarësinë e saj, dhe mbi këtë çështje duhet të ketë një diskutim të vërtetë,” është shprehur ai.
“Turqia është një partner shumë i rëndësishëm në mbrojtjen kolektive, e gjithashtu një anëtar i NATO-s. Turqia, si një vend modern musliman, ka patur dhe do të vazhdojë të ketë një vend në Europë,” do të theksonte Valls.
Franca është parë si një prej vendeve që e kundërshton fort anëtarësimin e Turqisë në BE, e në këtë kuadër, Manuel Valls ka ngritur zërin për një qëndrim më të qartë mbi këtë çështje.
Sidoqoftë, ai do ta vlerësonte kohë më parë Turqinë, duke thënë se kriza e refugjatëve do të kishte qenë më dramatike pa bashkëpunimin me të. /tesheshi.com/
