Kreu i diplomacisë turke, Mevlut Çavusolu, ka kërkuar nga homologu i tij kosovar, njëherësh z/kryeministër, Behgjet Pacolli që institucionet kosovare të mbyllin bizneset që financohen nga Gyleni.
Kryediplomati turk ka theksuar se është e papranueshme që në Kosovë të ketë prani gyleniste në sektorë të ndryshëm, pas asaj çfarë ndodhi në Turqi më shumë se një vit më parë me tentativën për grusht shteti, që sipas autoriteteve të Ankarasë ka qenë vepër e organizatës FETO të drejtuar nga kleriku me banim në SHBA.
Më tej, Çavusholu ka rikonfirmuar përkrahjen e Turqisë në mbështetjen e saj politike dhe në planin ekonomik për Kosovën.
Ai tha se lobimi për njohjen ndërkombëtare të Kosovës vazhdon, ndërkohë që premtoi intensifikim të raporteve ekonomike duke theksuar se ligji për investime strategjike i miratuar nga Kuvendi i Kosovës i ka hapur rrugë bizneseve turke për të investuar atje.
Kurse Pacolli kërkoi nga homologu i tij turk që të shfrytëzojë autoritetin e saj për të kërkuar nga Serbia që të zhbllokojë linjën e interkonjeksionit Shqipëri-Kosovë. Këtë kërkesë, Pacolli ia parashtroi kryediplomatit të Ankarasë gjatë një vizite zyrtare që po e zhvillon në Turqi.
Pacolli tha se për ndërtimin e linjës së interkonjuksionit Shqipëri-Kosovë janë investuar miliona euro ndërkohë që Serbia po e bllokon atë.
Në të njëjtën kohë, kryediplomati kosovar i ka kërkuar Turqisë që të depërtojë më shumë me produkte ushqimore në tregun kosovar në mënyrë që sipas tij Kosova të mos furnizohet vetëm me produkte njëburimore nga Serbia. /tesheshi.com/
