Nga Musa Mustafa
Nuk teprohet po të thuhet se banorët shqiptarët e veriut në Komunës se Mitrovicës nuk e ndjejnë ende se janë çliruar qe 16 vjet prej serbit mbi krye; nuk e ndjejnë që Kosova e tyre është shtet i pavarur qe 8 vjet; nuk e ndejnë që shteti i Kosovës është një shtet tashmë shqiptarësh. Kjo, ngase ata ndihen po aq të diskriminuar sikur fati i tyre të ishte ende në dorën e serbëve, siç ka ndodhur këtu e 100 vjet.
Dhe jo vetëm banorët shqiptarë, por dhe ata jo serbë, të cilëve u ka rënë për hise që të banojnë në Veri. Ndihen të diskriminar që nga kthimi në shtëpitë e djegura gjatë luftës, në punësim e në përkrahje institucionale apo shërbime publike.
“Ne jemi të lënë tërësisht pas dore si nga institucionet lokale ashtu edhe nga ato qendrore”, thonë banorët e veriut.
“Për dy vitesh, nga strukturat paralele serb dhe nga institucionet komunale të dala nga zgjedhjet lokale të Kosovës 2013-2014, nuk është lejuar që të rindërtohet asnjë shtëpi e shqiptarëve e shkatërruar gjatë luftës në Kosovë nga forcat ushtarako policore dhe paramilitare serbe”, ka lëshuar akuza Nazmi Ismaili, përfaqësues i lagjes ‘Kroi i Vitakut’ e njëherësh kryetra i Këshillit të veriut të Mitrovicës.
“Ka mbi dy vite që mjetet financiare janë të gatshme për ndërtimin e 6 shtëpive të shqiptarëve që janë shkatërruar gjatë luftës në lagjen ‘Kroi i Vitakut’, por strukturat paralele serb në bashkëpunim me organet komunale dhe policinë e Kosovës, nuk po na lejojë që t`i rindërtojmë”, ka thënë ai për portalin tesheshi.com.
Sipas tij, strukturat paralele serbe, duke përdoruar Komunën legale të veriut të Mitrovicës dhe Policinë e Kosovës, po i ndalojnë punimet, pasi inspeksioni komunal që është i pastër etnikisht vetëm me serbq, po sjell vendime në dëm të shqiptarëve për ndalim të punimeve.
Për Ismailin, nuk ka dyshim që në këtë lojë të ndyrë të strukturave paralele serbe po futet edhe Policia e Kosovës në veriun e Mitrovicës, e cila po urdhëron që punimet të ndalohen deri në ndonjë vendim të ri të organeve komunale.
Por në fakt, tek ‘Kroi i Vitakut’ në Veri jo se nuk ndërtohet. Ato po krijohen lagje të tëra banimi, ama jo me shqiptarë, por me serbë vendas e me kolonë serbë të ardhur nga Kroacia, qartazi për ta dominuar zonën, për ta çshqiptarizuar tërësisht, siç sqaron Ismaili.
“Kolonizim me serb i veriut të Mitrovicës dhe dëbimi i shqiptarëve me qëllim të pastrimit etnik të asaj pjese, është qëllimi parësor i strukturave paralele serb dhe institucioneve lokale serbe të veriut të Mitrovicës”, ka deklaruar plot dëshpërim ai.
Nazmi Ismaili sqaron se pas ngritjes së tensioneve nga ana e strukturave paralele serbe në pranverën e kaluar, kur banorët shqiptarë filluan t`i rindërtonin shtëpitë në lagjen ‘Kroi i Vitakut’, ndërhynë edhe dy ministra të qeverisë së Kosovës, ai për Kthim dhe Komunitete, Dalibor Jevtiq si dhe ministri i Administrimit të Pushtetit lokal, Ljubomir Mariq, duke formuar një Këshill Ndërministror me qëllim të kapërcimit të këtyre tensioneve dhe rifillimi të rindërtimit të shtëpive të shkatërruar gjatë luftës.
“Por tash e mbi tre muaj të formimit të këtij këshilli, punët nuk kanë shkuar asnjë milimetër para, nuk ka rindërtim të asnjë shtëpie të shqiptarëve në lagjen ‘Kroi i Vitakut’”, ka thënë Ismaili.
“Ne shqiptarët e veriun e Mitrovicës jemi ndër popujt më të diskriminuar në Evropë. Për ne e nuk çan kokën askush. Mjaft të thuhet se popullata shqiptare jeton me qira në jug, ndërsa që serbët le që nuk lejojnë të bëjnë rindërtimin e shtëpive tona të shkatërruara, po nga ata, por bëjnë dhe biznes me prona të shqiptarëve”, ka thënë i pari i lagjes ‘Kroi i Vitakut’, Nazmi Ismaili.
Më konkretisht, Ismaili rrëfen rastin e Shemsedin Miftarit, banor i Veriut, që jeton me ndihmat sociale e qira në jug të Mitrovicës, ndërsa truallin e tij në Veri e shfrytëzon Zvezdan Mihajloviq, i cili ka hapur biznese.
“Por policia dhe gjykata ende nuk kanë vendosur se kur do t`i lirojnë pronën Miftarit, edhe pse kanë tërë dokumentacionin”, ka thënë Ismaili për portalin tesheshi.com.
Tek shqiptarë në veri mbretëron një gjendje shumë rëndë ekonomike me papunësinë më të lartë në Kosovë.
“Për një vit në institucionet komunale në veri të Mitrovicës, Kryetar i Komunës së veriut, Goran Rakiq, nuk ka punësuar asnjë shqiptar”, thotë Nazmi Ismaili.
“Në komunën jugore të Mitrovicës nuk na marrin në punë sepse jemi banorë të veriut, në Veri nuk na punësojnë se jemi shqiptarë, atëherë shtrohet pyetja popull i kujt janë banorët shqiptarë të veriut të Mitrovicës?!”, shprehet Ismaili gjithë pezm.
Ai apelon tek institucionet komunale të veriut të Mitrovicës, tek institucionet qendrore të Kosovës, tek Presidentja, Kryeministri si dhe Kryetari i Kuvendit, që urgjentisht të ndërhyjnë në veriun e Mitrovicës që të ndihmojnë popullatën shqiptare që ka ngelur pa shtëpi, pa punë, pa buka e të diskriminuar skajshmërisht.
“Nëse institucionet qendrore dhe ato lokale nuk ndërhyjnë shpejt në kthimin e shqiptarëve në shtëpitë dhe banesat e tyre si dhe në rimëkëmbjen ekonomike, shqiptarë e veriut nuk do të rrinë duar kryq, ndërsa që pasojat do t`i bartin vetë pushtetarët”, ka paralajmëruar Ismaili. /tesheshi.com/
