Për të satën herë me rradhë përfaqësuesit ndërkombëtarë kanë kritikuar ashpër vendimin e presidentit të shtetit në Maqedoni, Gjorgji Ivanov për ti amnistuar të gjithë funksionarët e pushtetit të ngarkuar me vepra penale që dalin nga bisedat e përgjimeve, që kishte publikuar para 1 viti opozita maqedonase. Së fundmi edhe sekretari gjeneral i NATO-s, Jens Stoltenberg sot ka paralajmëruar Maqedoninë të mos lejoj që kriza politike të shkatërroj aspiratat e saj për tu anëtarësuar në aleancën veri-atlantike. Në deklaratën e parë lidhur me krizën politike në Maqedoni, sekretari Stoltenberg ka thirrur Presidentin Gjorgji Ivanov që të tërheq vendimin për abolim(amnisti).
“Nëse ecim përpara me IRJM-në atëherë është e rëndësishme atëherë ne së bashku duhet të zgjidhim problemin me çështjen e emrit. Por, gjithashtu duhet të sigurohemi që janë plotësuar kushtet minimale për zgjedhje kredibile. Gjithashtu është e rëndësishme që liderët në vend të adresojnë problemet e vazhdueshme me sundimin e ligjit, përfshirë këtu edhe tërheqjen e vendimit për falje të presidentit dhe mbështetjen e punës së Prokurorisë Speciale” ka thënë Stoltenberg.
Ai ka shtuar se Maqedonia është kandidat për anëtare në BE dhe NATO, ndërsa, mënyra më e mirë për sigurimin e stabilitetit në këtë vend të varfër ballkanik është anëtarësimi i saj në këto dy organizata. /tesheshi.com/
