Ministrat e Jashtëm të 28 vendeve anëtare të Bashkimit Europian do të përpiqen sot të mbyllin krizën maqedonase. Sipas burimeve diplomatike të tesheshi.com, brenda kancelarive kryesore të BE janë rritur kërkesat për një largim të Nikolla Gruevskit nga qeveria.
Sipas programit që e shpalli presidenca letoneze me Këshillin e BE-së, ministrat e punëve të jashtme të vendeve anëtare të Unionit, si pikë qendrore të mbledhjes e kanë situatën politike në Republikën e Maqedonisë.
Sipas agjendës, shefat e diplomacive të vendeve të BE-së, do të bisedojnë me përfaqësuesen e lartë për Politikë të Jashtme dhe Siguri Federika Mogerini, ndërsa pas mbledhjes së pasdites me sekretarin e përgjithshëm të Kombeve të Bashkuara Ban Ki-mun.
Konkluzionet që do t’i sjellë Këshilli i BE-së, këtë të enjte dhe të premte do të miratohen nga ana e shefave të shteteve dhe qeverive të vendeve të BE-së në Samitin e Këshillit Evropian.
“Në prill të këtij viti, Këshilli shprehu “shqetësim serioz në lidhje me përkeqësimin e situatës në vend, veçanërisht në fushën e qeverisjes të të drejtës, të drejtat themelore dhe lirinë e mediave”. Ai u bëri thirrje të gjitha palëve të ndërmarrin përgjegjësi dhe të ndërmarrin masa urgjente të drejtuara kah sigurimi i zgjidhjes së përmbajtur dhe në mënyrë konstruktive të përfshihen ta rifillojnë dialogun politik dhe ta kthejnë besimin në institucione”, citohet në paralajmërimin për debat për Maqedoninë që sot do ta kenë ministrat e punëve të jashtme të vendeve-anëtare të Bashkimit Evropian.
Në axhendën e shpallur për diskutim për Maqedoninë, theksohet edhe se Komisioneri Johanes Han, e ka vizituar Shkupin më 2 qershor dhe është takuar me udhëheqësit e partive kryesore politike në drejtim të gjetjes së zgjidhjes për krizën politike rrjedhëse në vend.
“Marrëveshja ishte arritur për një numër të madh të çështjeve, duke e përfshirë edhe përkushtimin ndaj reformave. Bisedat vazhduan në Bruksel më 10-të qershor, por ende nuk është arritur marrëveshje përfundimtare. BE-ja vazhdon t’u bëjë thirrje të gjitha palëve në interes të vendit të tij dhe qytetarëve të tij, të gjindet kompromis politik i përhershëm pa pezullime dhe të dilet me propozime konkrete për këtë qëllim, në bazë të marrëveshjes së 2 qershorit. Komisioni mbetet i gatshëm t’i lehtësojë diskutimet”, theksohet në dokumentin e zyrës së shtypit të Komisionit Europian në Bruksel. /tesheshi.com/
