Nga Blendi Gashi
Ambasadorja gjermane, Angelica Viets, ditë më parë ka dalë me një propozim konkret për tejkalimin e krizës politike në Kosovë që ka kapluar vendin për më shumë se shtatë muaj.
Ajo, në një intervistë për mediat kosovare, ka thënë se mënyra më e mirë për të tejkalur këtë situatë është formimi i një komisionindërmjetësimi që do të drejtohej nga Presidenti i Kosovës ose nga ndonjë personalitet që është i pranueshëm për palët.
Por shtrohet pyetja sa mund të rezultojë i suksesshëm krijimi i një komisioni ndërmjetësues nga kushdo që udhëhiqet ai.
Kjo për faktin se muaj më pare, kryetari i Kuvendit të Shqipërisë, Ilir Meta, takoi liderët politikë kosovarë në përpjekje për të ndërmjetësuar që të tejkalohet kriza, por që nuk ia arriti qëllimit.
Në muajin janar gazeta austriake “Der Standard”, përmendi emrin e Marti Ahtisaarit dhe Karl Bildtit si ndërmjetësues në tejkalimin e krizës politike, por partitë opozitare u deklaruan kundër ndërmjetësimit të mundshëm ndërkombëtar.
Opozita vlerëson propozimin e ambasadores gjermane
Opozita kosovare e vlerëson propozimin e bërë nga diplomatja gjermane, por thotë se nuk janë në dijeni nëse ka një përpjekje që të krijohet një komision i tillë; por thonë se mund ta pranonin nëse vërtet do nxirrte vendin nga kriza dhe ta çonte drejt zgjedhejve të reja.
Deputeti i NISMA për Kosovën, Zafir Berisha, thotë se ideja e ambasadores Viets për të ardhur deri te pika e ndërmjetësimit, herët apo vonë do të vijë në tavolinë për të diskutuar se si të dilet nga kriza institucionale.
Por deputeti Berisha thotë se zgjedhja e Thaçi president e bën pak të komplikueshme situatën, pasi ai nuk është një faktor që mund ta luajë rolin e ndërmjetësuesit. “Përndryshe duke pas parasysh situatën tepër delikate dhe të komplikuar që është aktualisht në skenën politike në vend, mendoj se duhet të përdoret modeli i Maqedonisë për të dale nga situata e krijuar në mënyrë që vendi të shkoj drejt zgjedhejve të parakohshme”, thotë Berisha, për tesheshi.com.
Propozimi i ambasadores Viets, është i mirëseardhur edhe për AAK-në e Ramush Haradinajt, ani pse qëndrimi përfundimtar i kësaj partie vazhdon të mbetet se “zgjedhjet janë e vetmja zgjidhje”.
AAK-ja nuk është në dijeni nëse në javët e fundit ka pasur ndonjë përpjekje për t’u krijuar ndonjë komision ndërmjetësues që vendi të dalë nga kriza politike që po thellohet dita-ditës edhe më shumë.
Por në rast se ide të tilla fillohen të aplikohen, atëherë partia e dytë opozitare, AAK është shprehur e gatshme për ta pranuar një komision të tillë.
Zëdhënësi i AAK- së, Muharrem Nitaj, ka deklaruar për mediat se për këtë subjekt politik, parimisht çdo ide ose propozim që do të çonte në zgjidhjen e krizës politike, është i mirëseardhur.
Por AAK nuk ka dhënë emra se kush mund të jetë pjesë e këtij komisioni, vetëm se vënë kusht, se në rast se ndodhë formimi i këtij i tij, të drejtohet nga persona të pranueshëm nga opozita e bashkuar’ e përbërë nga tri partitë VV-AAK dhe NISMA.
Visar Ymeri është takuar me ambasadoren gjermane
Burime të portalit tesheshi.com brenda Lëvizjes Vetëvendosje kanë bërë të ditur se kryetari i VV-së, Visar Ymeri ka pasur një takim me ambasadoren gjermane, me gjasë është biseduar për propozimin e bërë nga Viets për të lënë pas krizën politike në vend.
Portali tesheshi.com ka kontaktuar edhe me disa deputetë të VV-së por kanë thënë se nuk janë kompetentë të flasin për çështjen në fjalë, derisa ka qenë e pamundur të merret një mendim nga Visar Ymeri nëse ka biseduar me ambasadoren Viets për propozimin e saj. /tesheshi.com/
