Kryeministri Nikolla Gruevski dhe lideri i LSDM-së Zoran Zaev sot pasdite në Strasburg do të takohen me tre eurodeputetët, Riçard Hovit, Ivo Vajgël dhe Eduard Kukan.
Ata, siç pritet, do të bisedojnë për një qeveri të re apo zgjidhje që do ta nxjerrin vendin nga kriza aktuale politike.
Paraprakisht, Hovit, Vajgël dhe Kukan në Bruksel kanë pasur takime me përfaqësues të VMRO-DPMNE dhe LSDM-së, por hollësira nga takimet nuk janë kumtuar.
Eurodeputeti Hovit mori pjesë në protestën e së dielës që u organizua nga LSDM-ja dhe disa organizata joqeveritare, ndërsa dje ka pasur takim me përfaqësues të VMRO-DPMNE-së.
“Unë jam këtu që të vëzhgoj dhe nuk do të tentoj të fajësoj njërën apo tjetrën palë, kjo nuk është sjellje përgjegjëse, në rast se jemi pjesë e ndërmjetësimit, i cili duhet ta zgjidhë krizën politike”, deklaroi Hovit.
Gjatë ditës së sotme, Gruevski dhe Zaev do të takohen edhe me Komisionerin e BE për zgjerim Johanes Han, i cili do të tentojë t’i pajtojë kundërshtarët politikë, me qëllim të tejkalimit të situatës politike në vend.
Për këtë detyrë, Han mbrëmë u inkurajua edhe nga ministrat e punëve të jashtme të vendeve-anëtare të BE-së, të cilët në kuadër të Këshillit të Punëve të Jashtme të BE-së mbajtën mbledhje të shkurtër edhe për situatën politike dhe të sigurisë në Maqedoni dhe arritën marrëveshje që më hollësisht të përqëndrohen në këtë çështje në qershor.
/tesheshi.com/
