Policia izraelite hodhi gaz lotsjellës dhe shtiu me plumba gome ndaj palestinezëve brenda kompleksit të shenjtë të Jerusalemit, vetëm disa orë pas tërheqjes së masës së sigurisë nga portat rreth asaj pjese.
Raportet e hershme informuan se dhjetëra njerëz u plagosën në përplasjet pranë portës Hutta, e cila kishte vetëm pak çaste para se të rihapej për herë të parë që nga një sulm ndaj policisë izraelite nga tre palestinezë, që la dy oficerë të vdekur rreth dy javë më parë. Dhunë ka pasur edhe te Porta e Luanit, vendi kryesor i protestave kundër masave të sigurisë izraelite të sjella në zonë pas sulmit.
Gjysmëhëna e Kuqe e Palestinës tha se të paktën 46 vetë u plagosën në dhunën e fundit. Përleshjet e fundit ishin në kontrast të plotë me disa orë më parë, ku palestinezët festuan nëpër rrugë në qytetin e vjetër, pas tërheqjes së pikave të kontrollit të policisë izraelite në pikat e hyrjes në shenjtoren fisnike ose Haram al-Sharif.
Dëshmitarë okularë që ishin brenda kompleksit të xhamisë kur shpërthyen përplasjet, thanë se policia izraelite kishte gjuajtur plumba gome dhe bombola të gazit lotsjellës kundër atyre që kishin ardhur për t’u falur.
“Situata eskaloi shumë shpejtë, izraelitët hodhën gaz lotsjellës dhe plumba gome afër vendit ku po faleshin”, tha Ahmed, një student britanik i cili aktualisht ka ardhur në Palestinë si vullnetar.
“Pastaj ata dërguan policinë për kontrollin e turmave dhe trazira dhe mësynë për në kompleksin e xhamisë. Ata pastaj mbyllën portat për një kohë. Njerëzit nuk mund të ikin nga policia sepse janë të bllokuar brenda kompleksit”, shtoi ai. /tesheshi.com/
